02 июля 2008 г.
Çĕртме уйăхĕн 27-28-мĕшĕсенче Çĕрпỹ районĕнче "Уй кунĕ" иртнĕ. Унта çĕнĕ йышши ял хуçалăх техникин куравне йĕркелесси тĕп вырăнта тăнă. Темĕн тĕрлĕ техника _ хамăр çĕршыври тата чикĕ леш енчи 40 ытла фирмăпа компани, предприятипе организаци хăйсем туса кăларакан тракторпа машинăна, агрегатпа оборудование тăратнă. Вĕсен хисепĕ 140 таранах. Энергие перекетлеме пулăшакан, тухăçлă ĕçлекен ял хуçалăх машинисене хуçалăхсемпе организацисене "Чăвашагролизинг", "Чăвашагрокомплект", "Агротехкомплект", "Белпро-Сервис", "Агротрейдинг" Чăваш Енри дилер компанийĕсем сĕннĕ. Выставка ĕçленĕ 2 кун хушшинче республикăри 253 ял хуçалăх предприятийĕнчен 1000 ытла çын пулса курнă, пурĕ 200 миллион тенкĕлĕх ял хуçалăх техники туянма килĕшỹсем тунă. Чăваш Республикинчи Агро-Инноваци службин специалисчĕсем выставка ĕçленĕ вăхăтра тĕш тырă пухса кĕртекен комбайнсемпе ытти техникăна туянас кăмăллă предприяти-организацисемпе 11 миллион тенкĕлĕх проектпа смета документацийĕсем хатĕрленĕ.