21 июня 2008 г.
Йĕпреç Республика кунне уявлама хатĕрленсе Йĕпреç поселокĕ кунран-кун хăйĕн сăнне улăштарать. Акă, райцентрта 4 çухрăм тăршшĕ тротуар хывнă, тĕп урамсенчи çулсене йĕркене кĕртнĕ, тавралăха тирпейлĕх-хăтлăх кỹнĕ. Чукун çул вокзалĕ, иртнĕ ĕмĕрĕн 40-мĕш çулĕсенче лартнăскер, кивелсех çитнĕччĕ, паян унран капăртарах, илĕртỹллĕрех çурт ку тăрăхра çук та тейĕн. Ăна пĕтĕмпех уяв тумĕпе илемлетнĕ. Çавăн пекех станци умĕнчи лапама анлăлатнă. Çак кунсенче "Раççей чукун çулĕсем" АУОн Горькири чукун çул уйрăмĕн пуçлăхĕн çумĕ С.П.Мишин Йĕпреçре пулнă. Станци коллективĕ чаплă праçнике мĕнлерех хатĕрленнипе паллашнă. "Кашнинех "5" паллă лартма хатĕр", _ тенĕ вăл ăста алăллă çынсен ĕçне хакланă май. Вăл район пуçлăхĕпе А.И.Петровпа тĕл пулсан уяв кунĕнче асăннă объекта савăнăçлă лару-тăрура уçасси пирки калаçса татăлнă.