07 октября 2017 г.
Почтальон ĕçĕ ансатах мар. Шăрăхпа сивĕре те, çумăрпа çил-тăманра та унăн кулленех хăнăхнă сукмака такăрлатмалла, вулакансем патне вăхăтлă çитмелле.
Çăмăл мар пулсан та çак профессие суйласа илсе почта сумкине кăмăлпах йăтса çỹресе халăх çинче ырă ят-сум çĕнсе илеççĕ почта çыхăну уйрăмĕсен ĕçченĕсем.
Кỹлпуçри почта çыхăну уйрăмĕнче хаçат-журнал çырăнтарас плана çулсеренех тултарса пыраççĕ.
Валентина Охотинăпа Елена Анисимова почтальонкăсем "Елчĕк ен" хаçата ку тăрăхра кăмăлласах çырăннине хыпарлаççĕ. Юпа уйăхĕн 5-15-мĕшĕсенче иртекен çырăнтару вунăкунлăхĕ вăхăтĕнче вĕсем кашни вулаканпах уйрăммăн тĕл пулса калаçаççĕ. Почта çыхăну уйрăмĕн ертỹçи Светлана Яшина вĕсен ĕçĕпе кăмăллă. Çепĕç чĕлхеллĕскерсене вулакансем те питĕ кăмăллаççĕ, куç пек кĕтеççĕ.
- Тавах почтальонсене пире хаçат-журнал, унпа пĕрле кашни уйăхрах пенси укçине вăхăтлă парса тăнăшăн. Унсăр пуçне куллен кирлĕ таварсемпе те тивĕçтереççĕ. Халăхпа ырă та тарават вĕсем, - теççĕ Кỹлпуç тата Хăвăлçырма ялĕнче пурăнакан ватăсем почтальонсем пирки сăмах пуçарсан.
Çырăнтару вунăкунлăхĕнче Николай Савиновпа Александр Яшин тата ыттисем те район хаçатне хаваспах çырăнчĕç.
Е.ГЕННАДЬЕВА.