13 сентября 2017 г.
Раççей Президенчĕ Владимир Путин авăн уйăхĕн 3-мĕшĕнче алă пуснă хушăвĕпе Чăваш Ене çĕршывăн резерв фондĕнчен 26,5 миллион тенкĕ ытла укçа пама йышăннă.
Ырă хыпара республика Пуçлăхĕ Михаил Игнатьев ĕç тăвакан влаç органĕсен тата муниципалитетсен ертỹçисемпе кашни тунтикун ирттерекен канашлура пĕлтернĕ. Çак укçана тĕп хулари ачасен поликлиникине тĕпрен юсама уйăрнă.
Кашни регионра резерв фондĕнчен укçа памаççĕ. Пирĕн республика вара унтан çуллен пулăшу илет.
- Çак укçапа тирпейлĕ усă курмалла, юсав ĕçĕсене пысăк пахалăхпа пурнăçламалла, - палăртнă Михаил Игнатьев. Сывлăх сыхлавĕн министрĕ Владимир Викторов юсав ĕçĕсене пурнăçлакан организацие суйласа илмешкĕн çак эрнерех аукцион ирттерессине пĕлтернĕ.