02 августа 2017 г.
Уявра савăннă
Тỹскел ялĕн клубĕнче Тинĕс-çар флочĕн кунне анлăн паллă тунă.
Чи малтанах Тинĕс-çар флотĕнче службăра тăнă Николай Черновпа Николай Судаков уява пуçтарăннисене ăшшăн саламланă. Николай Чернов моряксен юррине шăрантарнă. Уявăн асра юлмалли саманчĕ - "Шуçăм" вокалпа инструмент ансамблĕн ĕлĕкхи солисчĕсем хальхи йышши инструментсемпе выляни. Владимир Шашков, Владимир Лазарев, Виталий Яковлев куракансене иртнĕ ĕмĕрĕн 80-мĕш çулĕсенчи юрăсемпе тыткăна илнĕ. Клуб çумĕнчи эстрада юррисен кружокне çỹрекен хĕрачасем те Тăван çĕршыв çинчен илемлĕ юрăсем шăрантарнă.
Хăвăлçырмара - çĕнĕ ФАП
Ку вăл Çирĕклĕ Шăхаль ял тăрăхĕнчи хальхи йышши оборудованипе пуянлатнă виççĕмĕш фельдшерпа акушер пункчĕ.
ФАПра икĕ ялăн çыннисем - 600 ытлан вĕсем - хăйсен сывлăхне тĕрĕслесе, çирĕплетсе тăрĕç. Çĕнĕ ФАП территорине тирпей-илем кĕртес тесе ял тăрăхĕн администрацийĕн ĕçченĕсемпе пĕрле вырăнти халăх та пысăк хастарлăх кăтартнă.
Асамлă кино тĕнчи
Лаш Таяпари культура çуртĕнче документлă кинофильмсем кăтартассине йĕркеленĕ.
Районăн 90 çулхи юбилейĕ умĕн куракансем "Я люблю Чувашию. Яльчикский район" тата "1984 г. Колхоз "Слава". Председатель И.Я.Денисов" фильмсемпе кăсăкланса паллашнă. Кунтах вĕсем "Стоп кадр" выставкăпа та интересленнĕ. "Кино тĕнчин асамлăхĕнче" программăра куракансем кинофильмсенчи сăнарсене, юрăсене аса илнĕ.
Салтак аттине тăхăннă
Чăваш Енре çуркуннехи призыв планне туллин пурнăçланă. Ку хутĕнче çара 1344 çамрăка ăсатнă. Кашни пиллĕкмĕш призывник - аслă пĕлỹллĕ. Çавăн пекех ДОСААФ организацийĕсенче çар специальноçне алла илнисем те пур.
Çара юрăхлисен шучĕ çулсерен ỹсни паллă. Медицина кăтартăвĕсем тăрăх, ку хутĕнче вĕсен йышĕ 72,1 процентпа танлашнă. Çакă пĕлтĕрхипе танлаштарсан, 3 процент нумайрах.
Салтака каяссинчен тарса çỹрекенсен тĕлĕшĕпе кăçал икĕ уголовнăй ĕç пуçарнă, 15 çынна административлă майпа явап тыттарнă.