02 августа 2017 г.
Кỹршĕллĕ Тутарстан Республикинче кайăк-кĕшĕк грипĕ алхасни Чăваш Енре пурăнакансене сыхлăх ĕçĕсене ирттерме хистерĕ.
Россельхознадзорăн Чăваш Республикинчи тата Ульяновск облаçĕнчи управленийĕ Чăваш Енри кайăк-кĕшĕк ĕрчетекен хуçалăхсене тĕрĕсленине те çав шутах кĕртмелле. Ветеринарипе санитари нормисене еплерех пăхăнаççĕ-ха çак хуçалăхсенче? Чир-чĕртен сыхланас енĕпе мĕнле ĕçсем пурнăçланă? Çак тата ытти ыйтусемпе кăсăкланнă инспекторсем.
Тĕрĕслевсем ирттернĕ май кашни хуçалăхрах çитменлĕхсемпе тĕл пулма, постановлени çырма тивнĕ. Нумаях пулмасть Чăваш Енре Африка чуми шар кăтартнă тĕслĕх те тивĕçлĕ пĕтĕмлетỹ тума пулăшман хăш-пĕр хуçалăх ертỹçисене. Шупашкар районĕнчи пĕр хресчен (фермер) хуçалăхĕнче, калăпăр, кайăк-кĕшĕк фермин территорине кĕнĕ çĕрте дезбарьер ăсталаман. Сăмах май, çак йĕркене пăхăнманнине сысна тата мăйракаллă шултра выльăх ĕрчетекен хăш та пĕр хуçалăхра та асăрхама пулать. Маларах асăннă хуçалăхра йĕркене пăхăнман ытти тĕслĕхсем те куç умне тухса тăнă: кайăк-кĕшĕк вилсен тĕпчемелли ятарлă пỹлĕм уйăрман, кайăк-кĕшĕке ĕçтерекен тата производствăра усă куракан шыв пахалăхне тĕпчемен. Маларах асăннă ĕçсене пурнăçламаллине Канаш районĕнчи усламçă та пĕлмен иккен. Шупашкар районĕнчи тепĕр хресчен (фермер) хуçалăхĕнче тупса палăртнă çитменлĕх - эмелсемпе тимсĕр пулни. Вĕсене упрас йĕркене пăхăнман кунта, пỹлĕмсем эмел упрама юрăхсăр пулнă. Çĕрпỹ районĕнчи тĕрĕслев вăхăтĕнче эмелсене тата дезинфекци тумалли хатĕрсене пĕр пỹлĕмре тытнине асăрханă. Тепĕр çитменлĕх - пỹлĕме сывлăша тĕпчемелли приборсем вырнаçтарманни.
Ветеринари йĕркисене хресчен (фермер) хуçалăхĕсенче анчах мар, чылай вăхăт ĕçлекен пысăк предприятисенче те пăхăнманни паллă пулнă. Тĕслĕхрен, инспекторсем кайăк-кĕшĕк ĕрчетекен пĕр комплекса кĕнĕ чух санпропускник юсавсăррине асăрханă. Йĕркене пăхăнман тепĕр тĕслĕх - вилнĕ кайăк-кĕшĕке тĕпчеме те, тĕп тума та ятарлă пỹлĕм уйăрманни. Производствăра усă куракан тата чăх-чĕпе ĕçтерекен шыв пахалăхне ятарлă лабораторире тĕрĕслеменни кунта та палăрнă. Кайăк виллисемпе каяша, апатпа çăмартана, чĕпĕсене пĕр çулпа турттарни те йĕркене пăснă пысăк тĕслĕх. Правилăсем тăрăх, вĕсене пурне те тĕрлĕ çулпа илсе тухмалла.
Суту-илỹ вăхăтĕнче ветеринари докуменчĕсем тивĕçлĕ шайра пулмаллине те аса илтерер ертỹçĕсене.
Н.ВАСИЛЬЕВА,
Россельхознадзор управленийĕн ĕçченĕ.