15 июля 2017 г.
Аварисен шучĕ ỹснĕ
Çул-йĕр çинчи аварисен шучĕ, шел пулин те, ỹссех пырать.
Кăçалхи 6 уйăхра район территорийĕнчи çул-йĕр çинче 9 авари пулнине (иртнĕ çулхи çак тапхăрта - 5) регистрациленĕ. Вĕсенче 15 çын (иртнĕ çул - 5) аманнă, вилекенсем пулман (2016 çулта 2 çын вилнĕ).
Çул-йĕр участникĕсене пурне те йĕркесене çирĕп пăхăнма, пĕр-пĕрне хисеплеме ыйтас килет. Водительсен хăвăртлăха виçерен ытла ỹстерме, çуран çỹрекенсен палăртман вырăнта çул урлă каçма юраманнине асрах тытасчĕ.
С.ВЕРШКОВ.
Вăхăтлă тỹлемен
Граждансене ĕç укçипе тата тĕрлĕ тỹлевпе тивĕçтересси - ĕç параканăн тĕп тивĕçĕ.
Елчĕк район прокуратури хĕрарăмăн ыйтăвне тивĕçтерсе Аслă Пăла Тимеш ял тăрăхĕн администрацийĕнче тĕрĕслев ирттернĕ, çавна май ĕç паракан кăçалхи пуш уйăхĕнчен пуçласа çу уйăхĕччен ача амăшне ачине пăхнăшăн паракан пособине вăхăтра тỹлеменнине, парăм 18 пин тенкĕпе танлашнине тупса палăртнă.
Асăннă ĕçпе тивĕçлĕ мерăсем йышăннă, ял тăрăхĕн пуçлăхне асăрхаттарнă.
К.ЯНДИМИРКИНА.
Вăйă-конкурс илĕртет
Çуллахи вăхăтра ачасен канăвне тĕрĕс те усăллă йĕркелесси çине культура ĕçченĕсем пысăк тимлĕх уйăраççĕ.
Курнавăшри культура çуртĕнче тăрăшакансем ачасемпе вĕсен ашшĕ-амăшне йыхравласа "Çакăн евĕр вăл çулла" ятпа конкурссемпе вăйăсем йĕркеленĕ. Кĕçĕннисемпе аслисем вăйă-кулă вăхăтĕнче пысăк активлăхпа палăрнă, çĕнтерỹçĕсем парнесене тивĕçнĕ.
Т.СМИРНОВА.
"Чи лайăх вĕрентекен"
Федерацин вĕренỹ тата наука сферине тĕрĕслекен службăпа "Российская газета" хаçат редакцийĕ 2017 çулхи выпускниксен хушшинче "Чи лайăх вĕрентекен" конкурс йĕркелет.
Шкултан вĕренсе тухнă яшсемпе хĕрсем хăйсене тĕрĕс çул суйлама пулăшнă, пĕлỹ тĕнчинче чи çывăх юлташ пулнă вĕренекенсем пирки эссе хатĕрлеме пултараççĕ. Чи лайăх 10 ĕç "Российская газета" хаçатра кун çути курĕ, авторсем парнесене тивĕçĕç. Ĕçсене concurs@obrnadzor.gov.ru адреспа тăратмалла.
Шăл тухтăрĕсем - ача садĕнче
Сывă пурнăç йĕркине пăхăнма, сывлăха упрама ачасене пĕчĕкренех хăнăхтармалла.
Елчĕкри тĕп больницăри стоматологи уйрăмĕн заведующийĕ Наталья Михайловская, Валентина Албарцева медицина сестри, Анжелика Кузнецовăпа Игорь Егоров студентсем çак кунсенче Елчĕкри "Чебурашка" ача сачĕн воспитанникĕсемпе курнăçнă. Тĕлпулу вăхăтĕнче вĕсем "Сывлăха тата шăлсене упрас" темăпа калаçу ирттернĕ.
Вулама йыхравлаççĕ
Вулани ăс-тăна çивĕчлетет анчах мар, тавракурăма ỹстерме те пулăшать.
Елчĕкри тĕп библиотекăри ача-пăча уйрăмĕнче интереслĕ чылай кĕнекесĕр пуçне кăсăклă хаçат-журнал та йышлă. Паянхи кун вулавăш "Свирелька", "Тошка и компания", "Винни и его друзья", "Маша и медведь", "Тетте" журналсем, "Мир детей и подростков", "Добрая дорога детства" хаçатсем çырăнса илет, çавна май вĕренекенсене вĕсемпе паллашма йыхравлать. Тĕрлĕ издани страницисем кĕçĕннисене пĕр çулхисен ỹсĕм-çитĕнĕвĕсемпе паллаштарнисĕр пуçне тивĕçлĕ воспитани илме, чăрмавсене татса пама пулăшĕç, шкулти тата пурнăçри çĕнĕлĕхсемпе паллаштарĕç, алă ĕçĕсем тума хăнăхтарĕç.