15 июля 2017 г.
Сăрьел ялĕнчи мичĕте уçнăранпа 25 çул çитнĕ май пысăк уяв иртнĕ.
Унта Чăваш Енри тутар ялĕсенчи имамсем, паллă тĕн çыннисем, тутар автономи культурин, район администрацийĕн, ял тăрăхĕн, вырăнти ялхуçалăх производство хуçалăхĕн ертỹçисем хутшăнчĕç.
Район администрацийĕн пуçлăхĕ Николай Миллин мăсăльман тĕнне ĕненекенсене паллă пулăмпа саламларĕ. Вăл районта тĕрлĕ халăх çыннисем, тĕрлĕ тĕне ĕненекенсем пĕр-пĕринпе туслă та килĕштерсе пурăннине палăртрĕ. Николай Петрович 60 тата 50 çул шăкăл-шăкăл пурăнакан, пĕр-пĕрне çур сăмахранах ăнланакан, çемье йăлине çирĕп тытса пыракан тата ачисене тивĕçлĕ воспитани парса ỹстернĕ Сунгатуллинсен, Шарифзяновсен çемйисене салам открыткисем парса чысларĕ.
ЧР тутарсен наци культурин автономи председателĕ Ф.Гибатдинов, инçетрен килнĕ хăнасем мичĕт тунă çĕрте ĕçленĕ çынсене тав туса медальсем парса чыс турĕç. Ырă та сăваплă ĕçе хутшăннă, наци йăли-йĕркине аталантарас, çамрăк ăрăва кăмăл-сипет енчен воспитани парас ĕçре тăрăшнă хăш-пĕр çынсем пирĕн хушăра çук та ĕнтĕ. Вĕсене те тивĕçлипе аса илчĕç.
Районти ветерансен канашĕн членĕ Ф.Харисов пухăннисене Сăрьел ялĕн, мичĕт историйĕпе паянхи кун-çулĕ çинчен каласа пачĕ. Район администрацийĕн наци ыйтăвĕсемпе ĕçлекен комисси тата районти ветерансен канашĕ ячĕпе Ш.Салахутдинова, ялти ытти хастарсене Тав çырăвĕ парса чысларĕç. Ял уявĕнче хăй тĕллĕн вĕреннĕ юрă-ташă ăстисем тутар, вырăс, чăваш юррисене нумайччен янăратрĕç. Хăнасене тутлă апат-çимĕçпе сăйларĕç.
Л.ЗАЙЦЕВА.