15 июля 2017 г.
Питрава Çирĕклĕ Шăхалĕнче, Çĕнĕ Пăвара, Кĕçĕн Таяпара асра юлмалла паллă тунă.
Ял праçникĕ вăл тус-юлташсемпе, тăвансемпе, хурăнташсемпе пĕрле пухăнса калаçни кăна мар - чи малтанах авалтан пыракан йăла-йĕркене манăçа кăларманни, ăна сыхласа хăварса малалла аталантарни.
Чылайранпа ĕнтĕ Çирĕклĕ Шăхаль тата Мучар çыннисем Петрпа Павăл çветтуйсен престол уявне пухăнаççĕ. Хальхинче те ир-ирех ял çийĕн хаваслă юрă-кĕвĕ шăранчĕ. Ялти çамрăксемпе культработниксем илемлĕ чăваш тумĕсем тăхăнса ушкăнăн-ушкăнăн культура çурчĕ умне пухăнчĕç. Вăйă картинче Питрав юррисем çепĕççĕн янăрарĕç, "Çерем уçса вир акрăм" вăййа вылярĕç. Хуткупăс сасси янраса кайсанах çамрăксем чăваш ташши çаптарчĕç.
- Çирĕклĕ Шăхальсем ĕçлеме те, канма та пĕлеççĕ, - палăртрĕ ял тăрăхĕн пуçлăхĕ Леонид Кошкин.
Леонид Анатольевич пухăннисене уяв ячĕпе саламланă май общество пурнăçĕнче активлăх кăтартакансене Тав çырăвĕсемпе чысларĕ. Çавăн пекех уявра "Чи тирпейлĕ урам", "Чи хăтлă хуçалăх", "Чи лайăх чечек ăсти" конкурссен çĕнтерỹçисене палăртрĕç. Вĕсем - Юбилей урамĕнче пурăнакансем - Осиповсем, Е.Захарова.
Салам сăмахĕсем çумне "Эмметево" ООО директорĕ Юрий Лапшин та хутшăнчĕ.
Унтан ял çыннисемпе хăнасем "Тарават" ансамбль шăрантаракан илемлĕ юрăсем итлесе киленчĕç. Кунтах тĕрлĕ конкурссем иртрĕç. Уйрăмах такмакçăсемпе хуткупăс калакансен тупăшăвĕ уява пуçтарăннисен кăмăлне çĕклерĕ.
Каçхине вара чăваш эстрада çăлтăрĕсен концерчĕ иртрĕ.
"Пурăнать-ха тăван ялăм, пурăнать..." - тесе мăнаçланса килĕсене саланчĕç ял çыннисем. Чылай кил-çуртра тус-тăван кĕрекинче йăлана кĕнĕ какай шỹрпи сăмсана кăтăкларĕ.
О.МУРАВЬЕВА.