05 июля 2017 г.
Кил-çуртра пушар тухни - калама çук пысăк инкек. Вăрă хăйне кирлине анчах илет пулсан, пушар вара ĕмĕрĕпе пухнă пурлăха самантрах кĕле çавăрать.
Кăçал граждансем кăмака хутнă чух асăрханусăр тата кăмакасем юсавсăр пулнипе районта 3 пушар пулнă.
Сăлтавĕсем вара кăмакасене тата тĕтĕм çулĕсене тĕрĕс мар купаланинче е вырнаçтарнинче, вăхăт иртнĕ май кирпĕчсем пусăрăннăран е тĕрлĕ енне куçнăран, тăм тĕпреннĕрен пулнă шăтăксенчен вут-çулăм тухнинче. Юлашки вăхăтра кăмакаран тухакан тĕтĕм валли асбестоцемент мăрьесемпе усă курма пуçларăмăр. Чылай чух вĕрине тỹсеймесĕр çак мăрьен строительство хутăшĕ тĕпренсе пĕтет, çавна пула çулăм çывăхри конструкцисене хыпса илме пултарать.
Пушар тĕрĕс вырнаçтарнă кăмакаран та тухма пултарать. Вутта бензин е керосин, ытти хăвăрт тивсе илекен хатĕрсемпе усă курса тивертме юрамасть. Кăмакана хутса ярсан ăна асăрхасах тăмаллине, çул çитмен ачасене кăмака хутма ирĕк пама юраманнине асрах тытар. Кăмака умне кăвар ỹкменрен 0,5х0,7 метр çунман материал вырнаçтарни, çывăха тумтир, çунакан ытти хатĕр çакса хурасран, сĕтел-пукан лартасран асăрханни те инкекрен сыхлать. Хутас умĕн кăмакана тĕплĕн тĕрĕслемелле, юсавсăр пулсан юсамалла, тĕтĕм çулĕсене тасатмалла. Мăрьене тата стенасене шуратни тĕтĕм тухакан вырăнсене палăртма пулăшать. Мăрье çумне çулçă, пăчкă кĕрпи, çулăм тивсе илме пултаракан ытти япаласем хурар мар.
Пушар хăрушсăрлăх йĕркине çирĕп пăхăнар. Çакă пире пысăк инкекрен упрать.
С.САРДАЕВ.