01 июля 2017 г.
"Уй кунне" хутшăннă
Чăваш Республикин Ялхуçалăх министерствипе Çĕрпỹ район администрацийĕ йĕркеленĕ республикăри "Уй кунĕ-2017" курава Елчĕксем те хутшăннă.
Унта вĕсем Раççей Федерацийĕн ытти регионĕсем хатĕрленĕ ялхуçалăх техникин куравĕпе, ялхуçалăх культурисен малашлăх сорчĕсене çитĕнтерессин технологийĕпе паллашнă.
Тислĕке - уй-хире
"Комбайн" ялхуçалăх производство кооперативĕнче выльăх апачĕ хатĕрленипе пĕрлех ферма территорийĕнчи тислĕке уя кăларас ĕç хĕрỹ пырать.
Тислĕк турттарнă çĕрте Владимир Изратов, Александр Григорьев водительсем, Владислав Айметов, Николай Мазюкин механизаторсем тăрăшаççĕ. Станислав Елисеев механизатор паха удобрение тиесе тăрать. Хальхи вăхăтра нумай çул ỹсекен курăк ани çине 2000 тонна яхăн тислĕк кăларнă.
Елчĕксем çĕнтернĕ
Республикăра çулсерен иртекен "Чăваш Республикинчи патшалăх тата муниципалитет пулăшăвĕсемпе тивĕçтерекен чи лайăх нумай функциллĕ центр" конкурса пĕтĕмлетнĕ.
Çĕнĕлĕхе мала хурса ĕçлекен Елчĕкри нумай функциллĕ центр кăçал та çĕнтерỹçĕсен йышĕнче. Хальхинче вăл "Лучшая практика управления персоналом МФЦ" номинацире 1-мĕш вырăна тухнă. Çĕнтерỹçĕсене дипломсемпе чысланă.
Черетлĕ заняти
Районти тĕп библиотекăра "Шурă туя" клубăн черетлĕ занятийĕ иртнĕ.
Н.Петрова библиотекарь Н.Стогова писателĕн кĕнеке куравĕпе паллаштарнă. Занятие Елчĕк тата Комсомольски районĕсенчи куç курманнисен обществин председателĕ Г.Михайлов, РФ Пенси фончĕн Елчĕк районĕнчи уйрăмĕн ертỹçи З. Яковлева хутшăннă, пухăннисене канăç паман ыйтусем çинче чарăнса тăнă, пенси саккунĕн çĕнĕлĕхĕсемпе паллаштарнă.
Шкулта - хĕрỹ ĕç
Елчĕкри пĕтĕмĕшле пĕлỹ паракан вăтам шкулта çĕнĕ вĕренỹ çулне хатĕрленме тытăннă.
Хальхи вăхăтра кунта хĕрỹ ĕç пырать. Акт залĕнчи, информатика кабинетĕнчи урайсене сăрланă, картлашкасене çĕнетнĕ. Уйрăмах кĕçĕн классенче вĕренекенсен класĕсем çуталса илемленнĕ.
Юсава хупăнать
Елчĕкри "Улăп" физкультурăпа сывату комплексĕ çитес тунтикунран юсава хупăнать.
Кăçалхи чỹк уйăхĕнче ăна уçни 10 çул çитет. Çавна май тĕплĕ юсав ĕçĕсем тума вăхăт çитнех. Комплекса август çурринче уçма палăртнă. Çанталăк ăшăтса пынă май бассейнра мар, кỹлĕсенче шыва кĕме меллĕ. Асăрханулăха кăна çухатмалла мар.
Кушкăсем - Раççейри призерсем
Пĕтĕм Раççейри пĕтĕмĕшле пĕлỹ паракан шкулсем хушшинче йĕркеленĕ "Шкулсенчи чи лайăх сайт-2017" конкурса Кушкăсем те хутшăннă.
Вĕсем "Информативность" номинацире Атăлçи федераци округĕнче виççĕмĕш вырăна тухнă.
(Район администрацийĕн сайтĕнчен).