01 июля 2017 г.
Декретлă отпуск вăхăтĕнче ачасемпе çулталăк çурă ларнă тапхăршăн пенсие тепĕр хут шутласа пани пирки редакцие сахал мар шăнкăравлаççĕ. Çакăн çинчен тĕплĕнрех Раççей Пенси фончĕн районсем хушшинчи Управленийĕн Патăрьел районĕнчи начальникĕнчен Галина Синеевăран каласа пама ыйтрăмăр.
- Галина Петровна, ачасемпе ларнăшăн пенсисене тепĕр хут шутланин сăлтавĕ мĕнре?
- Маларах пенси виçине палăртнă чухне ачапа çулталăк çурăччен ларнă тапхăра стажа кĕртнĕ, халĕ ăна пенси балĕсемпе те шутлама пулать.
- Кун пек чухне ачасен шучĕ пĕлтерĕшлĕ-и?
- Кашнин тĕрлĕрен. Енчен те виçĕ ачаран сахалтарах тăк, хушăм сайра-хутра кăна тивĕçет - тĕпрен илсен, совет тапхăрĕнче нумай çул ĕçленĕ тата пĕчĕк шалу пулсан çеç. Нумай ачаллă амăшĕсен те балсем тăрăх шутласа паракан хушма тỹлев тухмасса та пултарать, вĕсене пенсие хальхи пекех хăварсан тупăшлăрах.
- Эппин, ачасемшĕн стажа тата балсене пĕр вăхăтрах шута илмеççĕ?
- Тĕп тĕрĕс. Енчен те балсем тăрăх çĕнĕрен шутлатпăр пулсан - стаж пĕчĕкленет, вăл шутра - ялти те. Ку пур амăшĕсемшĕн те тупăшлă мар. Сăмахран, пенси ỹсĕмне çитмесĕрех тивĕçлĕ канăва тухнисем стажа балсемпе улăштарсан пенсие маларах тухнин правине çухатма пултараççĕ, çавăнпа та вĕсен заявленийĕсене хирĕçле пăхса тухаççĕ.
- Хушăм мĕнлерех пулĕ?
- Кашни çыннăн расна. Тĕпрен илсен, хушăм пĕчĕк шалу илнисене е пенси палăртнă чухне ĕç укçи пирки справка çуккисене лекме пултарать. Çакна ăнланни кирлĕ - хушăм пурне те тивĕçмест. Çĕнĕрен шутлани тепĕр чух усса каймасть, ун пек чухне пенси виçи малтанхи пекех юлать.
2015 çултан тивĕçлĕ канăва тухнисен вара пенсие тепĕр хут шутласси пирки пăшăрханас çук - вĕсене тупăшлă условисене тивĕçлĕ канăва тухнă чухнех палăртнă.
- Пенсие çĕнĕрен шутлаттарас тесен мĕнле документсем кирлĕ?
- Паспорт, ачасен çуралнă хучĕсем (енчен те вĕсене маларах тăратман пулсан). Енчен те свидетельство çинче паспорт илни çинчен паллă çук пулсан унпа пĕрле ачана çулталăк çурăччен воспитани панине ĕнентерекен урăх документ (ачан аттестачĕ) тăратмалла.
- Заявление хăçанччен тăратма юрать?
- Заявлени парассине чикĕлемен. Ăна кирек хăçан та пама юрать. Маларах телефонпа е Интернет урлă çырăнсан меллĕрех. Вĕсене Пенси фончĕн клиент службинче, çавăн пекех НФЦра йышăнаççĕ. Патшалăх пулăшăвĕсен порталĕн "Гражданинăн харпăр хăй кабинетĕнче" электронлă мелпе ыйту çырма та май пур.