01 июля 2017 г.
Çĕртме уйăхĕн 27-мĕшĕнче - Раççейре çамрăксен кунне паллă тунипе пĕрлех районта выпускниксен балĕ иртрĕ. Кăçал Елчĕк районĕнчи вăтам шкулсенче вĕреннĕ 190 ача алла шкул пĕтернине çирĕплетекен аттестат илнĕ. Вĕсенчен 12-шĕ ылтăн медале, 7-шĕ хĕрлĕ аттестата тивĕçнĕ.
Патшалăхăн пĕрлехи экзаменĕсен тапхăрне ăнăçлă тỹссе ирттернĕ яш-кĕрĕмшĕн халĕ пур енне те çул уçă - ППЭ кăтартăвĕсемпе çĕршывăн кирек хăш регионĕнчи заведенине те вĕренме кĕме май пур.
Елчĕк шкулĕ. Уява вĕренекенсемпе тата вĕрентекенсемпе пĕрле ашшĕ-амăшĕ, ачасен çывăх тăванĕсем йышлă хутшăнчĕç. Кăçал 11-мĕш класран 74 ача вĕренсе тухрĕ - алла аттестат илчĕ. Тĕп мероприятисем Елчĕкри культурăпа кану центрĕнче иртрĕç. Уява хутшăннисене чи малтанах Елчĕк шкулĕн директорĕ Лариса Васильева саламларĕ. Ачасене тивĕçлĕ воспитани тата ăс-тăн панăшăн, вĕсене тĕрлĕ енлĕ аталантарса пынăшăн ашшĕ-амăшĕпе вĕрентекенсене пысăк тав сăмахĕ каларĕ. Выпускниксене вара малашлăхра ырă та такăр çул, Елчĕк шкулĕн ят-сумне çỹлте тытма телейпе ăнăçу сунчĕ.
Выпускниксем сцена çине тухса шкулта вĕреннĕ чухнехи самантсене ытарлăн сăнласа панă май куракансене хăйсен тĕрлĕ енлĕ пултарулăхĕпе паллаштарчĕç. Хăйсен ертỹçисене тав туса саламланă, чунтан юратнине тата чĕререн тав тунине сăнарланă самант ашшĕ-амăшĕпе вĕрентекенсене уйрăмах хумхантарчĕ. Шкулта чылай çул ĕçлесе пысăк опыт пухнă выпускниксен класс ертỹçисем - Наталья Носова, Ирина Егорова, Евгения Корнилова, ытти вĕрентекенсем ырă сăмахсене чăннипех те тивĕçлĕ.
Уяв хаваслă дискотекăпа тата тỹпене пин-пин çутăпа çĕкленнĕ фейерверкпа вĕçленчĕ.
Лаш Таяпа шкулĕ. Выпускниксене вĕренсе тухса алла аттестат илнĕ ятпа шкул директорĕ И.Чернова, Лаш Таяпа ял тăрăхĕн пуçлăхĕ С.Павлов, Турă Амăшĕ çуралнин ячĕллĕ чиркỹ настоятелĕ Силуан иеромонах ăшшăн саламланă. Тăван шкулпа вĕрентекенсене халалланă сăвă-юрă, чĕрене хумхантаракан ăсату вальсĕ пуçтарăннисене куççульлентернĕ.
Шкулпа сывпуллашнă май выпускниксем тăван шкул ятне асра тытма, çуралнă тăрăха килнĕ чух унта час-часах кĕрсе тухма сăмах панă. Вĕрентекенсемпе ашшĕ-амăшĕ вĕсене малашлăхра ăнăçусем, ырăлăх суннă, такăр çул пилленĕ.
Çирĕклĕ Шăхаль шкулĕ. Шкултан кăçал 10 ача вĕренсе тухнă. Çав шутран 3-шĕ - Елена Яшина, Дмитрий Волков, Ирина Иванова - медалистсем. Вĕсемех Чăваш Республикин Пуçлăхĕн стипендиачĕсем. Стипендиатсен йышĕнче çавăн пекех Наталья Федорова та пур.
Пурнăçăн анлă çулĕ çине тухма хатĕрленекен выпускниксене шкул директорĕ Виталий Карчиков, класс ертỹçи - вырăс чĕлхипе литература вĕрентекен Лидия Павлова тата ытти педагогсем, ашшĕ-амăшĕ саламланă, чун туртакан вĕренỹ заведенийĕсенче ăс пухса кăмăл туртакан профессие суйласа илме ырă та такăр çул суннă.
Предмет олимпиадисен, конкурссемпе ăмăртусен çĕнтерỹçисене уйрăммăн чысланă. Уявра ачисене тивĕçлĕ воспитани панă ашшĕ-амăшне те тав хучĕсемпе хавхалантарнă.
Е.ПЕТРОВА.
Сăнỹкерчĕкре: ылтăн медальсемпе хĕрлĕ аттестатсене тивĕçнĕ Елчĕкри пĕтĕмĕшле пĕлỹ паракан вăтам шкултан вĕренсе тухакансен ушкăнĕ.