28 июня 2017 г.
Ăнăçу сана, çамрăк офицер
Кашни çулах пирĕн районта çуралса ỹснĕ вун-вун çамрăк çар институтĕнчен вĕренсе тухать, офицер ятне илсе çар службине малалла тăсать.
Июнĕн 17-мĕшĕнче Саратоври Жуков орденлĕ, Хĕрлĕ Ялавлă çар институтĕнчен çамрăк офицерсем вĕренсе тухнине савăнăçлăн паллă тунă, вĕсене офицерăн пĕрремĕш - лейтенант ятне панă. 191 выпускникран 2-шĕ çар институтне ылтăн медальпе, 22-шĕ питĕ лайăх паллăсемпе пĕтерни çинчен дипломсем илнĕ. Вĕсен хушшинче Аслă Елчĕк ялĕнче çуралса ỹснĕ Алексей Александрович Шаков та пур. 2012 çулта Тăван çĕршыв хỹтĕлевçин çул-йĕрне суйласа илнĕ вăл. Унпа ашшĕ-амăшĕ тивĕçлипе мухтанма пултарать. Алексей Шаков çар службине Хĕвеланăç çар округĕнче малалла тăсма контракт çырнă.
И.КОЗЛОВА,
республикăри çар комиссариачĕн Комсомольски тата Елчĕк районĕсенчи уйрăмĕн сотрудникĕ.
Сăваплă ĕç
"Ачалăхшăн, ачалăх ячĕпе" ыркăмăллăх марафонĕ малалла пырать.
Елчĕксем хальлĕхе марафон счечĕ çине 213498,60 тенкĕ хывнă. Ырă кăмăллисен йышĕ кунран-кун ỹссе пырать. Юлашки вăхăтра сăваплă ĕçе хутшăннисен йышĕнче - Г.Иванова (Тỹскел), И.Григорьева, В.Щипцов (Таяпа Энтри), Л.Зайламова (Аслă Елчĕк), В.Портнова (Елчĕк). Вĕсем нумай ачаллă çемьесене, тăлăх ачасене пулăшас тĕллевпе пухмач кассине 3000-420-шер тенкĕ укçа куçарса панă.
Ырă ĕç ырăпах таврăнать. Çавăнпа та марафонран пăрăнса ан юлăр.
Сумлă юбилей
Патреккелĕнчи Лидия Петрова тыл ĕçченĕ 90 çулхи çуралнă кунне паллă тунă.
Лидия Георгиевна Патреккелтех çуралса ỹснĕ. Çичĕ класс пĕтернĕ хыççăнах хуçалăхра ĕçлеме пуçăннă та мĕн тивĕçлĕ канăва тухичченех унта тăрăшнă. Нумай çул тỹрĕ кăмăлпа ĕçленĕшĕн панă наградăсем те сахал мар унăн. 4 ача çитĕнтернĕ ĕç ветеранне Елчĕк ял тăрăхĕн пуçлăхĕн çумĕ О.Левая, Патреккел халăх хорĕн артисчĕсем ăшшăн саламланă.
Пушар ан кăтарттăр шар
Кăçал районта 10 пушар тухнă. Вăл 473 пин тенкĕлĕх тăкак кỹнĕ.
Пушарта 2 çын вилнĕ, 2 çын аманнă. "Хĕрлĕ автан" Лаш Таяпа, Тăрăм, Аслă Пăла Тимеш, Елчĕк, Аслă Таяпа, Аслă Елчĕк ялĕсенче алхаснă. Пушар асăрхавĕн патшалăх инспекторĕсемпе Елчĕкри 44-мĕш пушар чаçĕн ĕçченĕсем кулленех ялсенче пулаççĕ, вут-кăварпа тимлĕ пулмаллине асăрхаттарса калаçусем йĕркелеççĕ.
Фестиваль-конкурсра çĕнтернĕ
Тĕн культурине тата тĕн этикине вĕрентекен педагогсен пултарулăхне тупса палăртса малалла аталантарас тĕллевпе республикăра фестиваль-конкурс иртнĕ.
Унта Елчĕкри пĕтĕмĕшле пĕлỹ паракан вăтам шкулти кĕçĕн классен учителĕ Вера Молоствова хутшăннă. Вăл "Христиан çемйи" темăпа мастер-класс ирттернĕ. Вера Геннадиевна ĕçне жюри пысăка хурса хакланă. Вăл "Православи культурин никĕсĕ" номинацин çĕнтерỹçи пулса тăнă.
Хăрушлăхран асăрханса
Асфальтлă тикĕс çул пулсан-и, кирлĕ çĕре хăш вăхăтра çитсе тăнине сиссе те юлаймăн.
Иртнĕ çулхи кĕркунне Мучар тата Тĕмер ялĕсем хушшинчи 1,1 çухрăм инçĕшне асфальт сарнăранпа Çирĕклĕ Шăхаль ял тăрăхĕнче пурăнакансем çак çулпа çил вĕçтерсе анчах çỹреççĕ. Анчах ун чухне Мучар ялĕ çывăхĕнчи çĕр кĕпер территорине хăрушлăхран асăрханмалли хỹтĕлеве пĕтĕмпех вырнаçтарма ĕлкĕреймен пулнă. Хальхи вăхăтра районти çул-йĕр ĕçченĕсем çĕр кĕпер таврашне хỹтĕлев (пурĕ 84 метр) вырнаçтарассипе ĕçе пикеннĕ.