28 июня 2017 г.
экономика форумĕ Шупашкарта кăçалхипе вуннăмĕш хут иртнĕ. Унăн ĕçне федераци, регионсенчи ĕç тăвакан влаç органĕсенче тăрăшакансем, финанс тата инвестици структурисенчи, бизнес-пĕрлешỹсен тытăмĕнчи паллă çынсем, Раççейри тата ют çĕршывсенчи общество ĕçĕ-хĕлĕнче вăй хуракансем хутшăннă.
Чăваш Республикин Пуçлăхĕ Михаил Игнатьев вак тата вăтам предпринимательлĕх тытăмĕнчи экономика аталанăвĕн çул-йĕрĕ пирки чарăнса тăнипе пĕрлех нумаях пулмасть Санкт-Петербург хулинче пĕтĕм халăхсем хушшинче иртнĕ экономика форумĕнче Раççей Президенчĕ Владимир Путин палăртнă тĕп тĕллевсем çинче чарăнса тăнă: "Умри йывăрлăхсемпе чăрмавсем предпринимательсен ĕмĕт-тĕллевĕсене пурнăçа кĕртме хистеççĕ. Çакна шута илсе кашни кунхи ĕçе йĕркелесе пырассинче çĕнĕлĕхсемпе анлăн усă курассине, инвестици хывассине малти вырăна хумалла. Экономикăна, социаллă сферăна тата ытларах вăй илтерессишĕн пĕр-пĕринпе килĕштерсе, пĕр-пĕрне пулăшса ĕçлемелле", - тенĕ.
Макроэкономика процесне палăртакан тата анализ ĕçĕсемпе ĕçлекен коммерциллĕ мар партнерăн ертỹçи Дмитрий Белоусов форумра тухса калаçма тỹр килнипе усă курса Раççей аталанăвĕн çул-йĕрĕ пирки хăйĕн шухăшне пĕлтернĕ. Вăл экономикăн пысăк пуласлăхĕ пирки чарăнса тăнă. Сăмах май, вăл Чăваш Республикинче çынна инвестици хывас политикăна тытса пынине пысăка хурса хакланă. "Регионта кадр ыйтăвĕсем çине пысăк тимлĕх уйăрни куçкĕрет. Çакă вара - чи кирли, - тенĕ вăл. Промышленноçри мониторинг центрĕн директорĕ, РФ обществăлла палатăн членĕ Илья Семин Чăваш Ен инвестици илĕртỹлĕхĕн ĕç кăтартăвĕпе аслă лигăра тăнине, "ОПОРА РОССИИ" вак тата вăтам предпринимательлĕхĕн Пĕтĕм Раççейри обществăлла организацийĕн вице-президенчĕ Виктор Степанов çирĕп командăн ăста ертỹлĕхĕн тивлетне пула Чăваш Ен инвестици илĕртỹлĕхĕпе малти вырăна тухнине палăртнă.
Раççей Федерацийĕн Суту-илỹпе промышленноç палатин вице-президенчĕ Дмитрий Курочкин регионта инвестици явăçтармалли схемăна ăнăçлă йĕркеленине, RAEX "Эксперт РА" рейтинг агентствин генеральнăй директорĕ Дмитрий Гришанков Чăваш Республикин кредит тỹлессин шанăçĕ хăватлă пулнине, унсăр пуçне, Чăваш Ен Европа агентствин шкалипе танлаштарса палăртакан ВВ кредит рейтингне тивĕçтернине палăртса каланă. Михаил Игнатьева кредитлă рейтинга пани çинчен ĕнентерекен официаллă свидетельствăна панă.
С.АНАТОЛЬЕВА.
ХАКЛАВ
Николай МИЛЛИН, Елчĕк район администрацийĕн пуçлăхĕ:
- Çĕртмен 23-мĕшĕнче иртнĕ "Регионсем - чикĕсĕр ĕçтешлĕх" курава хутшăнтăмăр. Пушă алăпа та килмерĕмĕр, кунта эпир тăван районăн çитĕнĕвĕсем çинчен, малашлăх тĕллевсене палăртакан стендпа паллаштартăмăр. Кăçалхи çул, уйрăмах, район çыннисемпе, вĕсен ỹсĕм-çитĕнĕвĕсемпе паллаштарни вырăнлă тесе шутлатăп. Мĕншĕн тесен кĕçех районăн 90 çулхи юбилейне паллă тума хатĕрленетпĕр.
Унсăр пуçне, ялхуçалăх предприятийĕсен тата хресчен (фермер) хуçалăхĕсен ертỹçисемпе пĕрле çавра сĕтел ĕçне хутшăнтăмăр. Çĕр ĕç культурисене çитĕнтерессипе, выльăх-чĕрлĕх продукцийĕсене туса илессипе ялан малта пулма хăнăхнă Елчĕк районĕнчи ĕçченсен тепĕр пысăк савăнăçне кăмăлтан пĕлтеретĕп. 2016 çулхи ĕç кăтартăвĕсен пĕтĕмлетĕвĕсем тăрăх пирĕн районти 16 ялхуçалăх предприятийĕ те "АГРО-100" клуб йышне кĕме тивĕçлĕ пулчĕç.
Елчĕксем кирек хăш ĕçре те малти пулнине çирĕплетсех калатăп. Ялхуçалăх производствине аталантарассинче анчах мар, культура пурнăçĕнче питех те хастар пулнине тепĕр хутчен курса ĕненетĕп. Уява хутшăннă çĕр-çĕр çын хушшинче йĕри-тавралла ăçта ан тинкер - кашни кун курса тăракан çывăх çыннăмсем куç тĕлне пулаççĕ. Республика уявне эпир кăçал, чăннипех, пысăк йышпа хутшăнма пултартăмăр. Районти культура ĕçченĕсен пĕрлештернĕ хорĕнче анчах 80 çын ытла, унсăр пуçне, Патреккелти халăх хорĕн, ветерансен "Туслăх" коллективĕсем. Елчĕк районĕн пултарулăх ушкăнĕсем Тĕп лапамра уява уçакансенчен пĕрисем пулса тăни, пушшех, чун-чĕрере мăнаçлăх туйăмĕ çуратрĕ.
Галина АНИСИМОВА, Елчĕк район администрацийĕн пуçлăхĕн çумĕ - финанс пайĕн ертỹçи:
- "Раççей регионĕсем - ỹсĕмĕн çĕнĕ çăлкуçĕсем" экономика форумне хутшăнма тỹр килнĕ май çакна палăртса калатăп: умри йывăрлăхсене çĕнтерсе Чăваш Ен экономики малалла аталанать. Раççейри ăсчахсем те пирĕн регион шанчăклă партнер пулнине тĕслĕхсемпе çирĕплетеççĕ. РФ субъекчĕн нумай регионĕ малашнехи пысăк ĕçсене Чăваш Республикин ертỹлĕхĕпе тата унăн çирĕп ушкăнĕнчи çынсемпе пĕрле пурнăçлама хатĕр пулнине палăртать. Хальхи вăхăтра та пирĕн республика тĕнчери 92 çĕршывпа хутшăнса суту-илỹ ĕçĕсене йĕркелесе пырать.
Ялхуçалăх тĕллевлĕ çĕр лаптăкĕсем пĕтĕмпех экологи тĕлĕшĕнчен таса пулнине, çапла майпа пирĕн республика çĕршыв валли "Органика" брендлă ятлă-сумлă таварсем туса кăларма пултарнине те халĕ тĕнчипех лайăх пĕлеççĕ. Республика Пуçлăхĕ Михаил Игнатьев тĕрлĕ санкцисене кура йывăрлăхсем сахал мар пулнă пулин те бизнесменсем хăйсен ĕçĕнче çитĕнỹсем тунине палăртса каларĕ.
Светлана АРХИПОВА ыйтса пĕлнĕ.