28 июня 2017 г.
Пăрачкав районĕнче кăçал Республика кунне уявланă. Çак кунах кунта çулсерен йĕркелекен ĕçпе юрă тата спорт уявĕ - Акатуй иртнĕ.
Уяв кунĕ Пăрачкав хамăр республикăри районсемпе хуласенчен анчах мар, кỹршĕ регионсенчен те вун-вун халăха йышăннă. Уява çавăн пекех Чăваш Республикин Пуçлăхĕ Михаил Игнатьев, Раççей Федерацийĕн Патшалăх Думин депутачĕ Алена Аршинова, Раççей Федерацийĕн Федераци Канашĕн членĕ Вадим Николаев, Чăваш Республикин Патшалăх Канашĕн Председателĕ Валерий Филимонов, Чăваш Республикин Информаци политикин тата массăллă коммуникацисен министрĕ Александр Иванов тата ытти официаллă çынсем хутшăннă.
Михаил Игнатьев тĕрлĕ ĕçре палăрнă пултаруллă çынсене, нумай ачаллă тата çамрăк çемьесене наградăсемпе чысланă.
- Эсир пултаруллă та ĕçчен халăх пулнине ĕçпе çирĕплетсе паратăр, район аталанăвĕшĕн вăй хурса тăрăшатăр, - тесе палăртнă вăл район халăхне саламланă май.
Çак кун Михаил Васильевич Пăрачкав районĕнчи Куславкка ялĕнчи çĕнĕ фельдшерпа акушер пунктне (республикăри 127-мĕш ФАП) уçма хутшăннă. Асăннă ФАП ялти 455 çынна сипленме май парĕ, çĕнĕ йышши оборудованисем вырнаçтарнă çурт халăхăн ыйтăвне туллин тивĕçтерĕ.
Уяв питĕ кăсăклă иртнĕ. Хăнасем хуткупăссемпе сăмаварсен, вырăнти художниксен, тĕрлĕ районпа хуларан килнĕ алĕç ăстисен тата ытти тĕрлĕ куравсемпе кăсăклансах паллашнă. Уявра Чăваш Республикин тава тивĕçлĕ художникĕ Александр Ильин Чăваш Ен Пуçлăхне унăн портретне парнеленĕ.
Пăрачкав районĕнче тĕрлĕ халăх çынни килĕштерсе пурăнать. Çавна пулах пуль, культура программи те анлă пулнă. Программăна мордва халăх пултарулăхĕн районти "Чипайне" ача-пăча фестивалĕ уçнă. Иваново облаçĕнчен килнĕ "Родник", Тверь облаçĕнчи купăсçăсемпе такмакçăсен "Завалинка", Киров облаçĕнчи "Поморочка" тата "Мы - вятские" ансамбльсем, Китай Халăх Республикинчен килнĕ Сычжоуск оперин театрĕ, Çĕмĕрлепе Улатăр районĕсенчи пултарулăх коллективĕсем, Çармăс халăх пултарулăхĕн "Арта" фестивалĕ, халăх музыкин "Раштав" ансамблĕн концерчĕ, "Раççей çăлкуçĕсем" фестивале хутшăнакансен тата вырăнти коллективсен юрри-ташши уяв илемĕ пулнă.
Пăрачкав тăрăхĕнче Крылов карапçă çуралса ỹснĕ май "Флот мухтавĕ" фестивальне те йĕркеленĕ. Куракансем çамрăк изобретательсен куравне ырă хак панă.
Е.ПЕТРОВА.