28 июня 2017 г.
Республика кунĕнче Чăваш Ен Правительстви халăхшăн пĕлтерĕшлĕ çĕнĕ объектсем хута янă. Шупашкарăн нумаях пулмасть йĕркеленнĕ районĕнче унпа пĕр ятлă "Çĕнĕ хула" ача сачĕ уçăлни маларах ачисене хваттерсенчен самай инçе вырнаçнă садиксене илсе çỹренĕ ашшĕ-амăшĕшĕн пысăк парне пулнă.
160 ачана йышăнма пултаракан ача садне уçма Чăваш Ен Пуçлăхĕ Михаил Игнатьев, Раççей Федерацийĕн Патшалăх Думин депутачĕсем Леонид Черкесов тата Алина Аршинова тата ыттисем те хутшăннă.
Çĕнĕ объекта тума 92 миллион тенке яхăн тăкакланă. "Çĕнĕ хула" ача садĕнче музыка, гимнастика залĕсем, кружоксем валли ятарлă пỹлĕмсем туса хăварнă. Кунта çỹрекен ачасем кĕçĕн çулсенченех робототехника, нанотехнологи вăрттăнлăхĕсене алла илĕç. Сăмах май, "Çĕнĕ хула" - тĕп хуламăрта кăçал уçăлнă иккĕмĕш ача сачĕ. Республика кунĕ умĕн, çĕртме уйăхĕн 20-мĕшĕнче, "Садовый" микрорайонта тепĕр ача сачĕ уçăлнăччĕ.
2017-2020 çулсенче шкул ỹсĕмĕчченхи 8 ача садне хута яма тата тĕпрен юсама палăртнă. Сăмах май, республикăра юлашки 5 çул хушшинче шкул ỹсĕмне çитмен ачасем валли 22,2 пин çĕнĕ вырăн йĕркеленĕ. Ача сачĕсем хальхи вĕрентĕвĕн мĕнпур ыйтăвне тивĕçтереççĕ, санитари нормисемпе килĕшсе тăраççĕ, ачасене пур енлĕ аталанма условисем те çителĕклĕ вĕсенче.