21 июня 2017 г.
Хальхи вăхăтри ялхуçалăх производствин ăнăçлă аталăнăвĕ - çĕнĕ технологисемпе анлăн усă курнинче.
Çакна тĕпе хурса пурнăçпа тан утакан "Победа" ОООра нумаях пулмасть 100 пуçран кая мар ĕне выльăх вырнаçмалли çĕнĕ вите тума тытăннă. Проектпа килĕшỹллĕн пурнăçлакан объектра апат сĕтелĕнчен пуçласа выльăхсен чĕрнисене касса тирпейлекен ятарлă вырăн таранах пулмалла.
Ялхуçалăх предприятийĕ строительство ĕçĕсене банкран пĕр тенкĕ укçа кивçен илмесĕр, хăйĕн вăйĕпе пурнăçлать. Проектпа смета документацийĕн хакĕ вара йỹнĕ мар - 10 миллион тенкĕпе танлашать.
Шупашкарти строительсен фирмин ĕçченĕсем ĕнесене пăрулаттаракан уйрăм пулакан çĕнĕ витене кĕске вăхăтра - пĕр уйăх çурă хушшинчи тапхăрта ĕлкĕртме сăмах панă.