17 июня 2017 г.
Раççей Федерацийĕн Президенчĕ Владимир Путин 2017 çулхи çĕртме уйăхĕн 15-мĕшĕнче журналистсемпе тата Раççей халăхĕпе ирттернĕ "тỹрĕ лини" (кăçалхипе 15-мĕш хут иртрĕ вăл) вăхăчĕ 3 сехет те 56 минута тăсăлчĕ, çак вăхăтра çĕршыв ертỹçи граждансен 73 ыйтăвĕ çине хурав пачĕ. Чи нумай вăхăт 2013 çулта пулнă, тỹрĕ эфир вăхăчĕ 4 сехет те 48 минутпа танлашнă.
Президент патне кăçал 2 миллион ытла ыйту килнĕ. Ыйтусене халăхăн пысăк пайĕ тỹрĕ эфир кунĕчченех шăнкăравласа, СМС çырса, видеороликсем хатĕрлесе ятарлă адрессем çине ярса пама пултарнă. Çавăн пекех "ВКонтакте", "Одноклассники" социаллă сетьсем урлă та ыйтусем тăратма май пулчĕ.
Халăха пăшăрхантаракан ыйтусен пысăк пайĕ социаллă сферăпа, пурăнмалли çурт-йĕр сферинчи чăрмавсемпе, ача укçипе пенси тата ĕç укçи шайĕпе, сывлăх сыхлавĕпе, социаллă çăмăллăхсемпе, вĕрентỹпе, çурт-йĕр строительствипе тата ытти нумай темăпа çыхăннă.
Тỹрĕ линири калаçу паянхи кун кашнинех пăшăрхантаракан ыйтуран пуçланчĕ. Президент "Раççейре экономика кризисĕ вĕçленнĕ-и?" ыйту çине хуравларĕ. Вăл обществăна йывăрлăхсем вĕçленнине питĕ систерес килнине, анчах сасартăк мĕн те пулин сиксе тухасран шикленсе асăрханарах калаçассине пĕлтерчĕ:
- Кунашкал пĕтĕмлетỹсем тăвиччен пирĕн кăтартусене пăхса хак памалла. Мĕн калаççĕ-ха вĕсем? Раççей экономики рецесси чикки урлă каçнине, ỹсĕм тапхăрне кĕнине çирĕплетеççĕ.
Çивĕч ыйтусенчен пĕри - пенси ỹсĕмне ỹстерессипе çыхăннă тема пулчĕ. Ертỹçĕ пенси ỹсĕмне ỹстерессине васкамасăр, тĕплĕн шухăшласа пăхса тухмаллине палăртрĕ:
- Хальлĕхе ку ыйтупа татăклă йышăну çук-ха. Тĕрлĕ сас-хурана ĕненмелле мар. Йышăну çук, анчах ыйтăва экспертсен тата Правительство шайĕнче сỹтсе яваççĕ.
Патшалăх ертỹçи малашлăхра татса памалли ытти çивĕч ыйтусем тавра (граждансен тупăш виçи чакни, чухăнлăхра пурăнакансен шучĕ ỹсни, ăнăçсăр экономика тытăмĕ, çавна май ĕç тухăçлăхне пысăклатма май килменни) ĕçлемеллине палăртрĕ.
ХАКЛАВ
Ольга ПЕТРОВА, Патреккелти пĕтĕмĕшле пĕлỹ паракан тĕп шкул директорĕ:
- Тỹрĕ эфир вăхăтĕнче ыйтусем çине хуравланă май Владимир Владимирович халăха хавхалантаракан чылай пулăмпа цифрăсене хыпарларĕ. Çĕршывăн тĕп çитĕнĕвĕсенчен пĕри - социаллă сферăри ỹсĕм: çамрăк ачапа амăшĕн пурнăçне упраслăх ỹсни. Çамрăк ачасем тĕрлĕ сăлтава пула вилеслĕх 3 хут, амăшĕсем пурнăçран уйрăлнă тĕслĕхсем 4 хут чакнă. Ку енĕпе Раççей тĕнчери çĕршывсенчен малти картлашкара тăрать. Юлашки вăхăтра этемĕн пурнăç тăршшĕ ỹснине те çирĕплетрĕ Президент. В.Путин Раççейре, Европăри çĕршывсемпе танлаштарсан, ача çураласлăх пысăк хăвăртлăхпа ỹснине те палăртрĕ. Çавăн пекех çывăх вăхăтра Амăшĕн капиталне индексацилес ыйтăва çĕклеме шантарчĕ.
Юрий ТЕТМУКОВ, Таяпа Энтринчи хресчен (фермер) хуçалăхĕн ертỹçи:
- Юлашки вăхăтра телевидени тата радио, хаçат урлă Европа Раççей тĕлĕшĕпе йышăннă санкцисем пирки час-часах хыпарланине илтме хăнăхрăмăр ĕнтĕ. Тỹрĕ лини вăхăтĕнче санкцисен вăхăтне малалла тăсни пире сиен кỹмĕ-и текен ыйтăва та çĕклерĕç. Паллах, санкцисем çĕршыва сиен кỹнине пытармарĕ Президент. Çакă пирĕн таварсен - нефть, газ, металлурги промышленноçĕ, хими, ытти таварсен - хакĕ çинче палăрнă. Çапах та ертỹçĕ çирĕплетнĕ тăрăх, санкцисен усси те пур иккен. Мĕнре палăрнă-ха вăл? Радиоэлектроникăра, авиа- тата ракетостроенире, фармацевтикăра, хăватлă машиностроенире ỹсĕмсем пур. Ялхуçалăхне илес пулсан, Раççей тĕш тырă экспорчĕпе лидерсен шутне кĕнĕ, сысна тата кайăк-кĕшĕк какайĕ туса илесси вăйланнă.
- Ирĕксĕрех пуç мимисене ĕçлеттерсе яма, пултарулăхпа усă курма вĕренме тиврĕ. Нефть, газ долларĕсем-сĕрех çитĕнỹ тума тиврĕ, - палăртрĕ çĕршыв ертỹçи.
Владимир МЕКШЕЕВ, шалти ĕçсен пайĕн сотрудникĕ:
- Çĕршыв ертỹçи граждансемпе ирттернĕ тỹрĕ лини вăхăтĕнче халăха пăшăрхантаракан тата интереслентерекен ыйтусем чылай пулчĕç. Журналистсем В.Путин çĕршывра юлашки вăхăтра пулса иртекен хирĕçлев акцийĕсене мĕнлерех йышăннипе кăсăкланчĕç. Халăхпа ертỹçĕсен хушшинче уççăнлăх яланах пулмалла. Президент çакнашкал мероприятисем саккунпа килĕшсе тăмаллине, митингсене "уйрăм çынсене рекламăлассишĕн, ят-сумне çĕклессишĕн, хăйсен ыйтăвĕсене татса парассишĕн" йĕркелеме юраманнине палăртрĕ.
Е.ПЕТРОВА хатĕрленĕ.