17 июня 2017 г.
Раççей Федерацийĕн граждансен сывлăхне упрамалли саккунпа килĕшỹллĕн ача пăрахас шухăшлă кашни хĕрарăма "Шăплăх кунĕсем" памалла. Çакă вăл 48 сехетрен пуçласа 7 кун таран тăсăлмалла. Çак тапхăрта хĕрарăм хырăмра çитĕнекен ача пуласлăхĕ пирки тĕплĕн шухăшлама пултарать.
Аборт тăвассине чакарас тĕллевпе республикăра "Шăплăх кунĕсем" акци иртрĕ. Унпа килĕшỹллĕн тĕрлĕ предприятисемпе организацисенче пулса аборт сиенĕ пирки калаçрăмăр, тĕрлĕ буклетсем валеçрĕмĕр. Хĕрарăмсен консультацийĕнче "Мана пурнăç парнеле" видеоролик кăтартрăмăр.
Раççейре пурăнакан хĕрарăмсем аборт нумай тăваççĕ. Çавна пулах çулсерен çĕршывра çуралайман миллион ытла ача пурнăçĕ татăлать. Çие юлнă пепкене алла илес е унран хăтăлас шухăшпа пурăнакан хĕрарăмсемпе малтанах психологсем канашлани усăллă. Елчĕкри тĕп больницăра та психотерапевт ĕçлет. Тухтăрпа калаçнă хыççăн пĕчĕк чунсен пурнăçне упраса хăваракан хĕрарăмсем тупăннă тĕслĕхсем те сахал мар. Кăçал кăна ача пăрахас шухăшлă 6 хĕрарăм аборта кайман.
Ача пăрахмалли сăлтавсем тĕрлĕрен пулаççĕ. Чылай чухне йышăнăва тĕплĕн шухăшламасăр тăваççĕ. Аборт тунă хĕрарăмсенчен чылайăшĕ каярахпа хăйсен йăнăшĕшĕн ĕмĕр тăршшĕпех ỹкĕнеççĕ. Çавăнпа та çак утăма шутламасăр, мăшăрпа, çывăх тăвансемпе, тухтăрсемпе канашламасăр тумалла мар.
И.СМИРНОВА,
районти тĕп больницăри акушер-гинеколог.