17 июня 2017 г.
Çĕр çинчи чи пархатарлă та сăваплă професси тесе калассăм килет манăн çын сывлăхне сыхласа пурăнакан шурă халатлă ĕçченсем çинчен.
Ахальтен мар вĕсен ĕç тумĕ те шурă - тасалăхпа çыхăннă. Çын чирпе нушаланнине курма чăтăмлăх çитермелле, çавăнпа ку ĕçе пурте тума та пултараймаççĕ. Тухтăр пулас тесен Турă панă таса туйăм та, çак ĕçе юратса хисеплени те - пурте çынра пулма тивĕçлĕ тесе шутлатăп. Пирĕн районта чăннипех те хăйсен ĕçне чун-чĕрипе парăнса, вăй-халне шеллемесĕр ĕçлекен тухтăрсемпе медицина сестрисем питех те нумаййăн. Йĕппипе çиппи пек пĕр тĕрре тĕрлесе пурăнакан мăшăрсем те сахал мар районти больницăра. Вĕсенчен пĕри - Любовь Сергеевнăпа Анатолий Ефимович Молоствовсем. Хăйсен ĕçне лайăх пĕлнипе, сăпайлăхĕпе палăрса тăрать çак çемье. Мария Алексеевнăпа Николай Николаевич Патшинсем çинчен те нумай ăшă сăмахсем калама пулать. Çынран ыйтма пултаракан, хăйĕн тĕслĕхĕпе ыттисене тăрăшса ĕçлеме хистекен хирург нумай çул хирурги уйрăмне те ертсе пырать. Николай Николаевич миçе çĕр çынна вăхăтлă пулăшу парса пурнăç парнелемен-ши? Хирурги уйрăмĕнчи йĕркелĕхпе тасалăха тытса тăрасси, чирлĕ çынсене ăшă сăмахпа та сыватассине хăйсен тĕп тивĕçĕ тесе шутлаççĕ кунта ĕçлекенсем. Мария Алексеевна ĕçлекен кабинетсен умĕнчен вара кунĕпе те çын татăлмасть. Хăйĕн лăпкă сассипе вăл йышăнăва килнĕ çынсене самантрах лăплантарма пултарать.
Валентина Петровнăпа Владимир Ильич Петровсем те ят-сума тивĕçлĕ. Çак çулсенче ăста хирург хăйĕн "ылтăн" аллисемпе нумай çынна вилĕмрен çăлса хăварнă. Мăшăрĕ вара операци сестри пулса тăрăшать.
Вера Алексеевнăпа Александр Васильевич Лапшинсем те хăйсен пурнăçне район больниципе çыхăнтарнă. Александр Васильевич хальхи вăхăтра онколог тухтăр, Вера Алексеевна участокри терапевт пулса вăй хураççĕ.
Светлана Алексеевнăпа Владимир Алексеевич Катайкинсем те хăйсен пĕтĕм ăсне, пĕлĕвне çынна тивĕçлĕ пулăшу парас тесе усă кураççĕ. Владимир Алексеевич ăста хирург, эндоскопист пур çынна та ялан пулăшма хатĕр. Светлана Алексеевна - физиотерапевт.
Пĕртăвансем - Галина Ивановна Уфукова, Людмила Ивановна Капламова Елчĕкре тĕпленнĕ. Галина Ивановна район больницине 1986 çулта ача-пăча врачĕ пулса ĕçлеме килнĕ, 2010 çултанпа тĕп тухтăрăн çумĕ пулса вăй хурать. Людмила Ивановна кунта 1989 çулта ура ярса пуснă. Хăйĕн ĕçне лайăх пĕлекен фтизиатр тухтăр ыттисенчен те çирĕп ыйтать. 2008 çулта ăна поликлиника заведующийĕ пулма çирĕплетнĕ. Шанса панă ĕçе вăл тивĕçлĕ шайра тытса тăма пултарать. Сăмах май, вĕсен Шупашкарта пурăнакан тепĕр аппăшĕ те терапевт тухтăр. Виçĕ хĕрĕ те тухтăр пулни амăшне - Клавдия Алексеевнăна пысăк савăнăç кỹрет мар-и?
Нумай çул ывăнма пĕлмесĕр районти больницăра тухтăр пулса ĕçлекенсем Людмила Александровна Клементьева, Людмила Павловна Майкова, Алиса Петровна Пупина та ăшă сăмахсене илтме тивĕçлĕ.
Ĕçре пысăк ăсталăх пухнă тухтăрсем çамрăксемшĕн ырă тĕслĕх пулса тăраççĕ. Пысăк та туслă коллектива 2010 çултан пуçласа Надежда Викторовна Уркова ертсе пырать. Вăл хăйĕн ĕç биографине тухтăр-терапевтран пуçланă. Нумай çул поликлиника заведующийĕ, аслă тухтăрăн çумĕ пулса ĕçленĕ. Палăртнă 7 çул хушшинчи тапхăрта район больници хăйĕн сăн-сăпатне нумай улăштарчĕ. Кунта, паллах, ертỹçĕн тỹпи те пысăк пулнине куратпăр.
Районти офис тухтăрĕсене те ырăпа асăнса хăварас килет. Н.В.Сунгатуллина, Л.М.Миллина, М.Н.Рыбкина, А.Г.Васильева, С.Г.Скворцова, Л.Н.Евстафьева, Н.П.Кускова педиатр халăхпа тачă çыхăнса ĕçлесе пыраççĕ.
З.ПОРТНОВА.
Аслă Пăла Тимеш ялĕ.