10 июня 2017 г.
Çĕртме уйăхĕн 8-мĕшĕнче Мускавра "Обществăлла финанспа пĕлсе чи ăнăçлă ĕçлекен Раççейри муниципаллă пĕрлешỹ" конкурс кăтартăвĕсене пĕтĕмлетнĕ.
Конкурсра Чăваш Республикинчи Муркаш районĕ 2-мĕш, Патăрьел районĕ 3-мĕш степеньлĕ дипломсене çĕнсе илнĕ.
Конкурс йĕркелỹçисем кăçал унта хутшăнма пурĕ 260 заявка тăратнине палăртнă. Ăмăртăва хутшăннисене 69 тĕрлĕ кăтартупа хакланă: финанс ыйтăвĕсемпе пĕлсе ĕçленине, муниципалитет пурлăхĕпе тухăçлă усă курнине, кадр ыйтăвне епле пурнăçланине, пĕр сăмахпа каласан, муниципалитетсен мĕнпур ĕçне тĕплĕн пăхса тухса хакланă.
Сăмах май, çак конкурса Раççейре 2007 çултан пуçласа тухса тăракан "Бюджет" журнал йĕркелесе тăрать. Вĕсем Раççейри финансистсен пĕрлешĕвĕсемпе тачă çыхăнса ĕçлеççĕ, РФ Федераци Канашĕн витĕмĕ те пысăк. Конкурс комиссийĕн йышне РФ Федераци Канашĕн, РФ Патшалăх Думин представителĕсем тата РФ Финанс министерствин ĕçченĕсем кĕнĕ.