03 июня 2017 г.
Раççей Федерацийĕн тата Чăваш Республикин ялхуçалăхăн тава тивĕçлĕ ĕçченĕ, Раççей Федерацийĕн тата Чăваш Республикин культурăн тава тивĕçлĕ ĕçченĕ, 1964 -2007 çулсенче Етĕрне районĕнчи "Ленинская искра" колхоза пĕр улшăнмасăр ертсе пынă, унăн хисеплĕ председателĕ Аркадий Павлович Айдак пурăннă пулсан 80 çул тултаратчĕ.
Ялхуçалăх производствине йĕркелес, çĕр ĕç культурине ỹстерес, эрозипе çивĕч кĕрешсе çутçанталăк пуянлăхне упрас ĕçре пысăк ăсталăх пухнă çак çыннăн ятне çĕршывĕпех лайăх пĕлеççĕ. Аркадий Айдак тăван хуçалăха пултаруллă, ỹсĕмлĕ аталантарса пынă, ял çыннисен пурнăç условийĕсене лайăхлатассипе пысăк тỹпе хывнă.
"Ленинская искра" колхоз, ăна председатель пулма шаннă вăхăтра, тарăн вар-çырмасемпе анчах "мухтанма" пултарнă. Ĕне, сысна, ытти выльăх çырма тăрăх çăрнă, курăк тымарне амантнă - эрозие вăй илтернĕ. Урăхла каласан, хуçалăхра йĕркесĕрлĕх хуçаланнă. Ĕç укçине ячĕшĕн анчах тỹленĕрен колхозниксем дисциплинăна пăхăнман. Çĕрулми кăларнă чухне те ăна пĕрер витре тултарса кун каçиччен килĕсене темиçе хутчен кайса килнĕ. Çак йĕркесĕрлĕхпе Аркадий Айдак ниепле те килĕшме пултарайман. Хуçалăха укçа-тенкĕсĕр çĕклеме май çуккине ăнланнă Аркадий Павлович халăхран выльăх туянса ăна ĕрчетес çул çине тăнă. 1970-1975 çулсенче темиçешер миллион тенкĕ тупăшпа ĕçлекен колхоз пулса тăнă. Хăмла отрасльне чĕртнĕ, эрозипе вирлĕн кĕрешнĕ, ял çыннине хушма хуçалăха вăй илме пулăшнă, шалăва ỹстернĕ.
Хуçалăхсене пысăклатас юхăма "Ленинская искра" та хутшăннă. 1972 çулта хăй хỹттине "Борец", тепĕр çулхине "Правда" тата "Вперед" колхозсене илнĕ. Çапла майпа "Ленинская искра" 14 яла пĕрлештерсе тăнă. Кунта пурĕ 1200 çын ĕçленĕ. Ĕçе ертсе пырассине çăмăллатма диспетчер служби туса хунă.