27 мая 2017 г.
Халăха ĕçпе тивĕçтерекен центрăн ĕçĕ тĕрлĕ енлĕ.
Вĕсенчен пĕри çула çитмен çамрăксене вăхăтлăх ĕçе вырнаçма пулăшасси пулса тăрать. Çак ĕçе район администрацийĕн вĕренỹпе çамрăксен политикин пайĕпе килĕшсе, канашласа туса пыратпăр. Малтан палăртса хунине тĕпе илсен, кăçал вĕренỹрен пушă вăхăтра çула çитмен 380 çамрăка ĕçе вырнаçтарма палăртнă. Çак тĕллевпе республика бюджетĕнчен 160,6 пин тенкĕ, вырăнти бюджетран 53,3 пин тенкĕ уйăрса панă. Çулталăк пуçланнăранпа Çĕнĕ Пăвари, Кушкăри, Аслă Елчĕкри, Çирĕклĕ Шăхалĕнчи, Лаш Таяпари, Курнавăшри вăтам шкулсемпе килĕшỹсем çирĕплетнĕ, вĕсенчи çула çитмен 186 çамрăка ĕçе вырнаçтарнă. Тĕпрен илсен, ачасем территорие тирпей-илем кĕртнĕ, юсав ĕçĕсене пурнăçланă çĕрте, шкул çумĕнчи участоксенче тăрăшаççĕ.
Пирĕн тепĕр тĕллев вăл - ĕç вырăнĕсĕр тăрса юлнă граждансене çĕнĕ професси пĕлĕвĕ илме, вĕсен квалификацине ỹстерме пулăшасси. Кăçал 15 çынна професси пĕлĕвĕ илме вĕренме янă. Вĕсем электрогазосварщик, тракторист, хуралçă, "1С Бухгалтери" операторĕ пулма вĕреннĕ. Сăмах май, вĕренме каяс кăмăллă çынсем тарăн та пахалăхлă пĕлỹ, кайран хăйсем суйласа илнĕ специальноçа чунтан парăнса ĕçлекенсем пулса тăччăр тесе центр специалисчĕсем малтан кашнийĕнпе уйрăммăн калаçнă, вĕсене тест йĕркипе професси илме суйласа илнĕ.
Отпускри - виçĕ çула çитмен ачисемпе килте ларакан хĕрарăмсене професси илме пулăшасси çине те пысăк тимлĕх уйăратпăр. Вăрăм отпуск вăхăтĕнчи професси хăнăхăвне тивĕçлĕ шая çитерес тĕллевпе кăçалхи çак вăхăтчен 3 хĕрарăм "1С Бухгалтери" специальноçне алла илнĕ.
О.СКВОРЦОВА,
халăха ĕçпе тивĕçтерекен районти центрăн ертсе пыракан инспекторĕ.