17 мая 2017 г.
Раççей почти хаçат-журнала 2017 çулхи иккĕмĕш çур çул валли йÿнĕрех хакпа - малтанхи 422 тенкĕ те 94 пус вырăнне 387 тенкĕ те 24 пуспа çырăнса илмелли вунăкунлăх пуласси çинчен пĕлтерсен ял çынни май пулнипе усă курса юлма тăрăшать.
Тĕрлĕ пулăшупа усă курнăшăн ĕнер Елчĕкри тĕп почтамта укçа тÿлеме пынă темиçе çын харăсах район хаçатне çырăнма кăмăл тунине пĕлтерчĕ. Район администрацийĕн финанс пайĕнче тĕп специалист-эксперт пулса ĕçлекен Надежда Орлова: «Подписчиксен кунĕ» иртнине «Елчĕк ен» хаçатра вуласа пĕлтĕм. Ăна халь çырăнма пулĕ-и?», - терĕ. Надежда Доброхотова почтальонка вулакан ыйтнине кăмăлтан тивĕçтерчĕ.
Çак кун йÿнĕрех хакпа хаçат-журнал çырăннă ытти çынсен шухăш-кăмăлĕсене те пĕлме тăрăшрăмăр:
Родион ПОРТНОВ, Кушкăри пĕтĕмĕшле пĕлÿ паракан вăтам шкул директорĕ:
- Елчĕке шкул ĕçĕпе килнипе усă курса килте вулама «Елчĕк ен», «Хыпар», «Советская Чувашия» хаçатсене тата «Халăх шкулĕ» журнал çырăнтăм. Шкул валли вара вĕсене малтанах çырăннă. Хаçат-журнал вуламасăр епле пурăнăн?
Виталий БОРИСОВ, Елчĕкре пурăнакан:
- Унччен те «Елчĕк ене» клиент кунĕнче йÿнĕрех хакпа çырăнма тÿр килнĕччĕ. Халĕ те меллĕ пулчĕ. Район хаçатне вуласан пĕлекен-паллакан çынсемпе тĕл пулса калаçнăнах туйăнать. Нумай хыпара хаçат урлă пĕлетпĕр-çке.
Анатолий БОГДАНОВ, педагогика ĕçĕн ветеранĕ:
- Хамăн ĕмĕр тăршшĕпех район хаçатне юратса вулатăп. Халĕ те унпа çыхăнăва çухатмастăп. «Елчĕк ен» журналисчĕсене те лайăх пĕлетĕп, паллатăп. Вĕсем пурте кунта нумай çул ĕçлесе пысăк ăсталăх пухнă çынсем.
Ыттисене те хаçат-журнала йÿнĕрех хакпа çырăнса юлма сĕнетĕп.
Светлана АРХИПОВА.
Сăнÿкерчĕкре: Надежда Доброхотова почтальонка Надежда Орловăна 2017 çулхи иккĕмĕш çур çул валли район хаçатне çырăнтарать.