17 мая 2017 г.
Çулталăк пуçламăшĕ тĕлне республикăра 956 наркомана шута илнĕ. Профилактика тĕлĕшĕпе сăнаса тăракансен йышĕнче вара - 2007 çын.
Наркотиксемпе усă куракансен пысăк пайĕ - арçынсем - 89,6 процент. Наркăмăш серепине лекнисенчен 54 проценчĕ - 18-30 çулсенчи çамрăксем. Шупашкарта 100 пин çын пуçне 135,6, Канашра - 118, Çĕнĕ Шупашкарта 95 наркомана шута илнĕ. Наркотиксемпе усă куракансен йышĕ Канаш хулинче уйрăмах пысăк - кунта пурăнакан 100 пин çын пуçне çакнашкал 422 çын тивет. Çакă республикăри вăтам кăтартуран 2,6 хут пысăкрах. Пуçламăш наркомани чирĕн шайĕпе Çĕмĕрле малта - 100 пин çын пуçне 53 çын. Çакă республикăри вăтам шайран 2,5 хут пысăкрах.
Иртнĕ çул Чăваш Енре право хуралĕн органĕсем наркотиксен, психотроплă хутăшсен саккунсăр çаврăнăшĕпе çыхăннă 659 преступление тупса палăртнă, саккунсăр майпа пуйма ĕмĕтленнисенчен пурĕ 37,6 килограмм наркотик туртса илнĕ. Çакă 2015 çулхипе танлаштарсан 199 преступлени сахалрах, анчах та туртса илнĕ наркотик виçи 22 процент нумайрах.
Республикăри полици ĕçченĕсем иртнĕ çул наркотикпа сутă тăвакан чылай ушкăна сиенсĕрлетнĕ. Наркотик сутса пуяс тĕллевлисен шутĕнче ытларах пайĕ - Украина çыннисем. Преступниксен йышĕнче çавăн пекех Чăваш Ен, Азербайджан, Таджикистан, Беларуç, Израиль çыннисем пур.
Л.ЕГОРОВА,
полицин районти пайĕн çул çитменнисемпе ĕçлекен подразделенин инспекторĕ.