13 мая 2017 г.
Организацисемпе предприятисен ертÿçисем ĕçлекене вăхăтра шалу тÿленине е тÿлеменнине прокуратура ĕçченĕсем тĕрĕслесех тăраççĕ.
Кăçал çулталăк пуçланнăранпа ĕç укçине тÿлессипе çыхăннă йĕркесене пăхăнман 46 тĕслĕхе тупса палăртнă, суда 33 заявлени тăратнă.
Çавăн пекех саккуна пăхăнман 12 ертÿçĕне асăрхаттарнă, 14 должноçри çынна административлă майпа айăпланă.
Кăçалхи ака уйăхĕнче анчах прокуратура ĕçченĕсем ĕç укçине вăхăтлă тÿлемен 4 организаци ертÿçине административлă майпа айăпласа 10 пин тенкĕрен пуçласа 16 пин тенкĕ таран штрафланă. Ĕçлев саккунĕсемпе килĕшÿллĕн ертÿçĕн ĕçченсене уйăхра 2 хут /укçа-тенке куçарсан 15 кунран кая юлмасăр/ шалу тÿлемелле. Тĕрĕслевсене çу уйăхĕнче те ирттерме палăртнă. Ĕç укçине вăхăтра тÿлеменнипе çыхăннă тĕслĕхсем пулсан район прокуратурине пыма ыйтатпăр.
В.НИКОЛАЕВ,
Елчĕк район прокурорĕ.