03 мая 2017 г.
Район администрацийĕн пуçлăхĕ Николай Миллин райадминистрацин пайĕсен, ял тăрăхĕсен, предприятисемпе организацисен ертÿçисемпе ĕнер ирттернĕ канашлура Аслă Çĕнтерÿ кунне хатĕрленесси тата çурхи уй-хир ĕçĕсене ăнăçлă ирттерсе ярасси тĕп вырăнта пулнă.
Пĕрремĕш ыйтупа Аслă Çĕнтерÿ уявне районта хатĕрленсе ирттерсе ярас тĕлĕшпе туса хунă оргкомитет председателĕ - район администрацийĕн пуçлăхĕн пĕрремĕш çумĕ Леонард Левый тухса калаçрĕ. Хăйĕн калаçăвĕнче вăл уяв иртекен вырăнсене тирпейлесе тасатас, илем кÿрес, вăрçă ветеранĕсене, салтак арăмĕсене, тыл ĕçченĕсене чыслас, уява мĕнпур шайри ертÿçĕсене, депутатсене явăçтарас, уяв мероприятийĕсене ял тăрăхĕсен, шкулсемпе культура учрежденийĕсен, предприятисен сайчĕсенче çутатас ыйтусене хускатрĕ. «Вилĕмсĕр полк» акци пирки канашлура тĕплĕнрех чарăнса тăчĕç. Вăл вилнисене мар, пире, чĕррисене кирлĕ. Иртнĕ вăрçă нуши кашни çемьене тенĕ пекех пырса тивнĕ. Пĕрисен ашшĕ, теприн аслашшĕ хăрушă вăрçă вутĕнчен тухайман, теприсен çывăх çынни унăн асапĕсене тÿссе ирттернĕ, тылра ырми-канми вăй хунă. Вĕсенчен нумайăшĕ пирĕн хушăра çук ĕнтĕ. Пирĕн, чĕррисен, хамăр аслă ăрури тăвансене манас марччĕ, вĕсене ачасен, мăнуксен асăнче хăварасчĕ. Канашлура каланă пек: эпир, чĕррисем, вăрçăра пуç хунă, унăн тертне тÿссе ирттернĕ çывăх çынсен сăнÿкерчĕкĕсене йăтса утма вăтанмалла мар. Вĕсем çветтуйсен вырăнĕнче вĕт. Унта ялсенче пурăнакансене, хăйсен паттăр тăванĕсене сума сăвакансене пурне те чĕнеççĕ. «Вилĕмсĕр полк» акци «Улăп» ФОК патĕнче пуçланать. Юбилей, Беляев, Совет, Иванов урамĕсемпе иртсе тĕп лапама пуçтарăнать.
Аслă Çĕнтерĕве халалланă мероприятисем ялсенче майăн 8-мĕшĕнче, район центрĕнче майăн 9-мĕшĕнче иртеççĕ. Çамрăксен митингĕ майăн 8-мĕшĕнче 21 сехетре пуçланать.
Уяв кунĕнче концертсем, спорт ăмăртăвĕсем иртеççĕ, аттракционсем ĕçлеççĕ.
Ялхуçалăх пайĕн начальникĕ Петр Тремасов районти уй-хир ĕçĕсемпе паллаштарчĕ. Вĕсем пур хуçалăхсенче те пыраççĕ. Уй-хирте 128 агрегат ĕçлет. Вĕсем нумай çул ÿсекен культурăсене минераллă удобренисемпе апатлантараççĕ, сÿрелеççĕ, çĕр хатĕрлеççĕ, акаççĕ. Район администрацийĕн пуçлăхĕ Николай Миллин çурхи уй-хир ĕçĕсене хăвăртлатмаллине, типшĕрнĕ çĕр лаптăкĕсене суйласа илсе ĕçлесе хатĕрлемеллине, акса хăвармаллине, пĕрчĕллĕ культурăсене акассине майăн 9-мĕшĕ тĕлне вĕçлемеллине палăртса каларĕ.