29 апреля 2017 г.
Ветерансене - тимлĕх
Тăван çĕршывăн Аслă вăрçинче çĕнтерÿ тунăранпа 72 çул çитнине кĕтсе илме хатĕрленнĕ май районта тĕрлĕрен мероприятисем йĕркелесе ирттереççĕ.
Аттелĕхĕн Аслă вăрçин ветеранĕсемпе, вăрçăра пулнисен тăлăха юлнă мăшăрĕсемпе, тыл ĕçченĕсемпе тата вăрçă ачисемпе куçа-куçăн тĕл пулассине, вĕсене май пур таран пулăшассине ку чухне тĕп вырăна хураççĕ.
Районти социаллă пулăшу центрĕн ĕçченĕсем иртнĕ кунсенче çак тĕллевпе Аслă Пăла Тимеш ял тăрăхĕнче пулнă. Вырăнти ял тăрăхĕн администрацийĕн специалисчĕсемпе пĕрле ветерансен пурнăç условийĕсемпе паллашнă, вĕсен тĕлĕшĕпе патшалăх шайĕнче çирĕплетнĕ çăмăллăх йĕркисем çинчен тата тĕплĕнрех ăнлантарса панă.
Чернобыль асран тухмасть
31 çул каялла Ченобыльти атом электростанцийĕнчи хăрушă аварие пула çĕршыври нумай çын инкек тÿснĕ.
Аварие пĕтерме хăйсен сывлăхĕ çинчен шухăшламасăр пушарнăйсемпе çар çыннисем, çав шутра пирĕн район çыннисем те унта сахаллăн мар хутшăннине пĕлетпĕр. Çак пулăмсем çинчен тĕплĕн çутатса панă «Чернобыль репортажĕ» кĕнекене иртнĕ кунсенче районти тĕп вулавăшра вулакансемпе тĕл пулса сÿтсе явнă.
Профессие тĕрĕс суйласа ил
Пĕтĕмĕшле пĕлÿ паракан вăтам шкултан вĕренсе тухакан яш-кĕрĕмшĕн профессие тĕрĕс суйласа илесси тĕп самант пулса тăрать.
Черетлĕ вĕренÿ çулĕ вĕçленес умĕн иртекен «Манăн професси пуласлăхĕ» уйăхлăхне хутшăнса районти тĕп вулавăшра паянхи пурнăçшăн питех те пĕлтерĕшлĕ тĕрлĕрен профессисемпе тĕплĕн паллаштаракан кĕнекесен куравне йĕркеленĕ. Аслă классенче вĕренекенсемпе ашшĕ-амăшĕ вĕсемпе кăсăкланса паллашнă.