26 апреля 2017 г.
Ака уйăхĕн 21-мĕшĕнче Чăваш патшалăх филармонийĕнче Вырăнти хăйтытăмлăх органĕсенче ĕçлекенсен кунне савăнăçлă лару-тăрура паллă тунă. Унта Чăваш Республикин Пуçлăхĕ Михаил Игнатьев, Министрсен Кабинечĕн членĕсем, Чăваш Республикин Патшалăх Канашĕн депутачĕсем, республикăри пур хуласемпе районсенчи представительсем хутшăннă.
Уяв ячĕпе саламланă май Михаил Васильевич халăхăн пурнăç условийĕсене лайăхлатас тĕллевпе ырми-канми ĕçлекен пур ĕçчене те тав сăмахĕ каланă, професси уявĕ ĕç кăтартăвĕсене пĕтĕмлетме тата малашлăх плансене палăртма май панине асăннă. Çитĕнÿсем пĕр-пĕринпе тухăçлă ĕçленипе пулаççĕ. Инвестици илĕртÿлĕхне палăртакан наци рейтингĕн пĕтĕмлетĕвĕсене тĕпе хурсан, Чăваш Ен Федерацин 85 субъекчĕ хушшинче 6-мĕш вырăн, граждансем хăйсене хÿтлĕхлĕ туяссине палăртакан рейтинг кăтартăвĕсемпе 16-мĕш вырăн йышăнни начар мар кăтарту.
- Йывăрлăхсене пăхмасăр çитĕнекен ăрăва пурнăçра вырăн тупма тивĕçлĕ майсем туса паратпăр эпир, çĕнĕ производствăсемпе пысăк технологиллĕ ĕç вырăнĕсем хута яратпăр, - палăртнă республика Пуçлăхĕ хăйĕн сăмахĕсенче.
Раççей Правительстви пысăк пулăшу панине, республикăри ертÿçĕсен тивĕçлĕ ĕçне кура Шупашкарти трактор тăвакан заводăн шăпи ырă енне улшăннине палăртма кăмăллă. 2016 çулхи раштав уйăхĕнчен пуçласа кăçалхи нарăс уйăхĕччен заводăн чи пысăк парăмĕсене саплаштарма пултарнă. Кăçал ака уйăхĕнче Внешэкономбанк предприятие 1,9 миллиард тенкĕлĕх кредит пулăшăвĕпе тивĕçтернĕрен 8,5 пин çын хăйсен ĕç вырăнне упраса хăварнă. 2017 çулта халăх валли 1,2 пин ытла çĕнĕ ĕç вырăнĕ тума палăртнă. Ятарлă программăпа килĕшÿллĕн, Канашра 8,7 миллиард тенкĕлĕх инвестици проекчĕсене пурнăçа кĕртни 1,5 пин çĕнĕ ĕç вырăнĕ хатĕрлеме май парĕ. 2018 çул вĕçне республикăри монохуласене 10 миллиард тенкĕлĕх инвестици явăçтарни 6 пин ытла çын валли ĕç вырăнĕ хатĕрлеме пулăшĕ.
Михаил Игнатьев вырăнти хăйтытăмлăх органĕсенче ĕçлесе тивĕçлĕ канăва тухнă ветерансене уйрăммăн саламланă, республика аталанăвне пысăк тÿпе хывнăшăн пысăк тав сăмахĕ каланă. Ертÿçĕ палăртнă тăрăх, влаçри çынсем халăх ырлăхĕшĕн тÿрĕ кăмăлпа тăрăшсан пурнăç условийĕ те лайăхланать, халăх шухăш-кăмăлĕ те ырă енне улшăнать - çакă обществăри тăнăçлăха упраса хăварма май парать. Паян çитĕнекен ăрăва патриотла воспитани парасси, граждансен кăмăл-сипет хаклăхне ÿстересси çине уйрăмах пысăк тимлĕх уйăрмалла.
Уява пухăннисене Чăваш Енри муниципалитетсен пĕрлешĕвĕсен Канашĕн Правленийĕн председателĕ, Элĕк район администрацийĕн пуçлăхĕ Александр Куликов, Чăваш Республикин Патшалăх Канашĕн Председателĕ Валерий Филимонов саламланă.
Асăннă тытăмра чылай çул чунне парса ĕçлесе ертÿçĕсемпе халăх хисепне çĕнсе илнĕ ĕçченсене патшалăх наградисемпе сумлани - чи кăмăллă самант. Ырă ята тивĕçнисем хушшинче пирĕн ентешсем те пур. Çирĕклĕ Шăхаль ял тăрăхĕн пуçлăхĕ Леонид Кошкин кăçал Вырăнти хăйтытăмлăх кунĕ умĕн пĕтĕмлетнĕ «Чăваш Республикин чи лайăх муниципалитет йĕркеленĕвĕ» конкурсăн «Муниципалитет йĕркеленĕвĕн чи лайăх пуçлăхĕ» номинацийĕнче çĕнтернĕ. Уявра Леонид Анатольевич пĕрремĕш степень диплома тата хаклă парнене тивĕçнĕ. Сăмах май, Л.Кошкин ял тăрăхĕн пуçлăхĕн должноçĕнче 2006 çултанпах тăрăшать. Пысăк опытлă, ял тăрăхĕнче пурăнакансен нуши-тертне лайăх ăнланакан ертÿçĕ кирек хăçан та халăх пурнăçне çăмăллатас тĕллеве мала хурать. Çитĕнĕвĕсем те сахал мар ял тăрăхĕн. 2007, 2008, 2013 çулсен кăтартăвĕсемпе вăл «Чăваш Республикинчи чи лайăх муниципалитет йĕркеленĕвĕ» ята тивĕçнĕччĕ. 2012 çул кăтартăвĕсемпе «Чи хăтлă ял тăрăхĕ» конкурсра малтисен йышне кĕни, пĕлтĕр «Пушар тĕлĕшĕнчен чи хăрушсăр ял тăрăхĕ» номинацире çĕнтерсе иккĕмĕш степень диплома тивĕçни тата кăçалхи награда Леонид Анатольевич халăхпа ĕçлеме пултаракан чăн-чăн хуçа пулнине лайăх çирĕплетет.
Маларах асăннă кăçалхи конкурсра Елчĕк ял тăрăхĕн депутачĕ Дмитрий Судаков «Чи лайăх староста» номинацинче çĕнтерсе виçĕмĕш степень диплома тивĕçни те пысăк çитĕнÿ. Ĕçне кура - хисепĕ. Дмитрий Николаевич пирки те ыррине анчах илтме пулать. Ял халăхĕн ыйтăвĕсемпе чăрмавĕсене татса парас, унăн пурнăçне çăмăллатас енĕпе чылай çул влаçпа тата халăхпа пĕр чĕлхе тупса ĕçлет Елчĕк ял тăрăхĕн депутачĕ.
Елчĕк район администрацийĕн тĕп бухгалтерне Ирина Марковăна «Чăваш Республикинчи Вырăнти хăйтытăмлăх органĕсенчи тÿрĕ кăмăллă ĕçшĕн» Мухтав паллипе, Аслă Пăла Тимеш ял тăрăхĕн специалистне Вера Рыбкинăна Чăваш Республикин Патшалăх Канашĕн Хисеп хучĕпе наградăланă. Вĕсем те хăйсен яваплă ĕçĕнче пысăк опыт пухнă, халăх хисепне çĕнсе илнĕ ĕçченсем.
Е.ПЕТРОВА.
Сăнÿкерчĕкре: Чăваш Республикин Пуçлăхĕ Михаил Игнатьев Ирина Марковăна награда панă самант