26 апреля 2017 г.
Контракт мелĕпе службăна тăракансен йышĕ ÿссех пырать юлашки çулсенче. Асăннă службăпа çыхăннă ыйтусем çине хуравсем илес тĕллевпе эпир Чăваш Республикин çар комиссариачĕн Комсомольски тата Елчĕк районĕсен уйрăмĕн ертÿçипе Сергей Даниловпа курса калаçрăмăр.
- Ырă кун пултăр, Сергей Юрьевич. Контрактпа службăна тăракансене хăш çар чаçĕсене яраççĕ тата камсене илеççĕ унта;
- Служба регионне, çар тĕсне суйласси - кашни гражданинăн ирĕкĕ. Яшсемпе хĕрсем 19-35 çулта, вăтам е аслă пĕлÿллĕ, сывлăх тĕлĕшĕнчен çирĕп, тÿсĕмлĕ пулмалла.
- Служба условийĕсем мĕнлерех?
- Хăш çар должноçне тата çар званине йышăннине, хăш регионта çар тивĕçне пурнăçланине тата мĕн вăхăт службăра тăнине кура пĕр уйăхри ĕç укçи 22500 тенкĕрен пуçласа 50000 тенкĕпе танлашать, ытти хушма тÿлевсем пур. Оборона министерстви хваттер укçи тÿлессипе çыхăннă тăкаксене саплаштарма компенсаци тÿлет, кунне виçĕ хутчен тÿлевсĕр апат çитереççĕ, тÿлевсĕр медицина пулăшăвĕпе тата тумтирсемпе тивĕçтереççĕ. Çулсерен отпуска яраççĕ, çул укçишĕн кайнă тăкака саплаштарнине те палăртса хăвармалла. Контракт вĕçленсен е контракт вăхăтĕнчех аслă е ятарлă вăтам пĕлÿ паракан вĕренÿ учрежденийĕсенче вĕренес ĕмĕтлисемшĕн те çул уçă. Контракта çирĕплетсенех çар должноçне тата званине кура 1 оклад чухлĕ тÿлевпе тивĕçтереççĕ. Çулсеренех 1 окладпа танлашакан укçан пулăшу панине те асăнар.
- Службăн çак тĕсне суйласа илес кăмăллисен чи малтанах ăçта каймалла?
- Контрактпа çар службине тăрас текенсен чи малтанах Комсомольски ялĕнче вырнаçнă Чăваш Республикин çар комиссариачĕн Комсомольски тата Елчĕк районĕсен уйрăмне е тÿрех Шупашкарти контрактпа служба ретне тăракансене суйлакан ятарлă пункта пымалла. Вăл çак адреспа вырнаçнă: Шупашкар хули, Пирогов урамĕ, 10 А çурт.
- Калаçушăн тавах.
Е.ПЕТРОВА хатĕрленĕ.