26 апреля 2017 г.
Професси суйласа илесси çыннăн пурнăçĕнчи тĕп самант шутланать.
Мĕншĕн тесен кашни çын хăйĕн кун-çулĕн пысăк пайне ĕçре ирттерет. Юратнă ĕç вара пурне те телей, савăнăç кÿрет. Çакна шута илсе паянхи çăмăлах та мар лару-тăрура аслă классенче вĕренекен яш-кĕрĕме шкул саккинченех професси суйласа илме пулăшас ыйтăва малти вырăна хураççĕ. Пирĕн районти шкулсем те çак тивĕçе туллин пурнăçланине хамăр курса тăратпăр. «Манăн професси пуласлăхĕ» профориентаци уйăхлăхне хутшăнса Çĕнĕ Пăвари пĕтĕмĕшле пĕлÿ паракан вăтам шкулта тăххăрмĕш класра вĕренекенсем нумаях пулмасть Елчĕкри «Промсервис» наукăпа производство пĕрлешĕвĕ» акционерсен хупă обществинче экскурсире пулса курни - кунти ĕç-хĕлпе паллашни те çакна çирĕплетет. Скважинăсем шăтарнă çĕрте усă куракан крахмаллă реагентсем тата ытти продукци туса кăларакан предприяти ĕçĕ-хĕлĕпе вĕренекенсене А.Мудрецов технолог паллаштарнă. Пĕлме çук, тен, кунта экскурсире пулса курнă яш-кĕрĕмрен хăшĕ те пулин малашне хăйĕн пурнăçне кунти ĕç-хĕлпе те çыхăнтарма пултарĕ.
Çĕнĕ Пăвари шкулта вĕренекенсем Патăрьелĕнчи агропромышленность техникумĕн преподавателĕсемпе те тĕл пулнă. Малашлăхра усăллă, кирлĕ пулма пултаракан профессисем, çĕнни пирки те нумай пĕлнĕ вĕсем.
Профориентаци уйăхлăхне хутшăнса Патреккелти тĕп шкулта вĕренекенсемпе ĕçлĕ вăйăсем, класс сехечĕсем, презентацисемпе калаçусем йĕркелесе ирттернĕ, документлă фильмсем кăтартнă.
...Чăваш Республикин Пуçлăхĕ Михаил Игнатьев Чăваш Енре рынок ыйтнине тивĕçтерекен кадрсем хатĕрлеме майсем çителĕклĕ пулнине, çамрăксене аталанма миллионшар тенкĕ тăкакланине палăртать.