15 апреля 2017 г.
Чăваш Республикипе М.В.Ломоносов ячĕллĕ Мускаври патшалăх университечĕ хушшинче пĕр-пĕринпе килĕшсе тачă çыхăнса ĕçлемелли ĕç хутне çирĕплетнĕ.
Евразири университетсен пĕрлĕхĕн канашĕн анлă ларăвĕнче Чăваш Ен Пуçлăхĕ Михаил Игнатьев МГУ ректорне Виктор Садовничие пĕр-пĕринпе тухăçлă ĕçленĕшĕн тав тунă. Паянхи кун Мускаври аслă шкулта Чăваш Енри 500 ытла яш-кĕрĕм пĕлÿ илет. Пулас студентсем физика, гуманитари, юриспруденци, хими, биологи, экономика тата ытти професси пĕлĕвĕсене илме тăрăшаççĕ. Раççейри чи паллă аслă шкулпа çакăн пек килĕшÿ туни малашне тата та анлăрах ĕçлеме пулăшнине палăртнă Михаил Васильевич.
МГУ ректорĕ Виктор Садовничий хăйĕн сăмахĕсенче Чăваш Енре вĕренÿ пайне аталантарас ĕçе ертÿçĕсем пысăк тимлĕх уйăрнине асăннă, çакăншăн Чăваш Республикин Пуçлăхне тав тунă.
Михаил Игнатьев пирĕн регионти вĕренÿпе наукăна аталантарас ĕçе пысăк витĕм кÿнĕшĕн МГУ ректорне Виктор Садовничие «Чăваш Республики умĕнчи тава тивĕçлĕ ĕçсемшĕн» орден медалĕпе чысланă.