15 апреля 2017 г.
Хальхи вăхăтра районта пурăнакан 40-е яхăн çынна ĕçпе тивĕçтерекен «Чăвашъенкрахмал» ООО коллективĕнче вăй хуракансен хĕл каçипе те пĕр канăçлă вăхăт пулмарĕ.
Александр Кудряшов генеральнăй директор /вăл апат-çимĕç промышленноçĕнче усă куракан оборудованисене хăй тĕллĕн ăсталас енĕпе çак çулсенче пысăк ĕç опычĕ пухнă инженер та/ ертсе пынипе çĕнĕ технологисене алла илессипе тĕпчев ĕçĕсене пурнăçлаççĕ. Кунта «крахмал завочĕсем» - крахмал туса кăларас ĕçре кирлĕ оборудованисен пĕтĕм комплектне хатĕрлес ĕçе те анлăн йĕркелесе янă. «Чăвашъенкрахмал» ОООри инженерсемпе технологсен вăйĕпе ку чухнехи пурнăç ыйтăвне шута илсе ăсталакан çакăн йышши ятарлă оборудованисене хальхи вăхăтра Раççейре урăх ниçта та туса кăлармаççĕ. Ют çĕршывсенчен килекен çакăн йышши оборудованисемпе танлаштарсан, вĕсен хакĕсем те тивĕçтермелле пулнине, унсăр пуçне, пĕчĕк тăкаксемпе ĕçе тухăçлăрах йĕркелеме май килнине те çирĕплетнĕ. Крахмал туса кăларас ĕçре кирлĕ оборудованисене туянма «Чăвашъенкрахмала» çак вăхăтчен Белоруссирен те килнĕ. Хальхи вăхăтра Тверь, Калуга облаçĕсенчи крахмал завочĕсен саккасĕсене палăртнă вăхăтра пурнăçлама ĕлкĕртессишĕн çĕрне-кунне пĕлмесĕр тăрăшаççĕ. Завод территорийĕнче те утма вырăн çук - вăл сутма хатĕрлесе çитернĕ оборудованисемпе тулса ларнă.
Предприяти ялхуçалăх продукцийĕсене ĕçлесе хатĕрлессипе те пысăк опыт пухнă.
Уйрăм çынсен - Кудряшовсен «Чăвашъенкрахмал» сахал яваплă обществăн пĕрремĕш предприятийĕ - крахмал завочĕ ĕçлеме тытăннăранпа 25 çул çитрĕ.
Светлана АРХИПОВА.
Алексей Егоров, Валерий Крылов сварщиксем хăйсене килĕшекен ĕçре тăрăшнипе кăмăллă.