12 апреля 2017 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предпрятисемпе организацисен ертÿçисемпе ирттернĕ канашлура вĕрентÿ ĕçне пăхса тухасси тĕп вырăнта пулнă.
Ку ыйтупа район администрацийĕн пуçлăхĕн пĕрремĕш çумĕ - вĕренÿ тата çамрăксен политикин пайĕн начальникĕ Леонард Левый тухса калаçрĕ. Вăл предметсен олимпиадин кăçалхи вĕренÿ çулĕнчи итогĕсене пĕтĕмлетрĕ, ачасен пĕлÿ шайне хаклакан тĕп паллă пулнине асăнса хăварчĕ. Кăçалхи вĕренÿ çулĕнче те предметсен олимпиадисем 7-11-мĕш классенче вĕренекенсем хушшинче 23 предметпа иртнĕ. Предметсен олимпиадисенче малтан чи лайăххисене шкулсенче суйласа илнĕ. Пултаруллисем район шайĕнчи олимпиадăна хутшăннă. Ытти çулсенче муниципалитет шайĕнчи олимпиада итогĕсене унта шкулсенчен хутшăннă ачасен шучĕ тата вĕсем пĕрремĕш-виççĕмĕш вырăнсене йышăннă тăрăх хакланă пулсан, кăçал тепĕр графа кĕртнĕ - олимпиадăна хутшăннин эффективлăхĕ. Ку енĕпе Елчĕкри пĕтĕмĕшле пĕлÿ паракан вăтам шкулăн чи пысăк кăтарту. Шкулти 353 ача муниципалитет шайĕнчи олимпиадăсене хутшăннă, 72-шĕ çĕнтерÿçĕ е призер пулса тăнă. Олимпиадăсене хутшăннин эффективлăхĕ 20,4 процентпа танлашать. Çав вăхăтрах пĕчĕк шкулсенче олимпиада призерĕсем питĕ сахал. Акă, Аслă Пăла Тимеш шкулĕнчен пĕр призер та çук. Тĕмертен, Кĕçĕн Таяпаран - пĕрер, Шăмалакран, Патреккелтен - 2-шер, Аслă Таяпаран 3 призер çеç. Çакă сахал ача пĕлÿ пухакан шкулсенче ачасем пĕр-пĕринпе тупăшса вĕренме майсем пулманнипе тÿрремĕнех çыхăннă теççĕ. Муниципалитет шайĕнче палăрнă вĕренекенсене республикăри олимпиадăна хутшăнма суйласа илнĕ. 12 вĕренекен республика шайĕнчи олимпиадăра палăрнă. Çав шутран 6-шĕ Елчĕк, 3-шĕ Çирĕклĕ Шăхаль, 2-шĕ Лаш Таяпа, пĕри Аслă Таяпа шкулĕсенчен. Чăваш чĕлхипе ирттернĕ олимпиадăра та Курнавăшсемпе Елчĕксем призерсен йышĕнче. Çирĕклĕ Шăхаль шкулĕнчи Дмитрий Волков физкультура, Елчĕк шкулĕнчи Николай Петров технологи предмечĕсемпе Пĕтĕм Раççей шайĕнчи олимпиадăна хутшăнаççĕ.
Кĕçĕн классенче вĕренекенсем хушшинче те районта, республикăра интеллект вăййисем йĕркелеççĕ. Кăçал пирĕн районти 6 ача республикăри тупăшура призерсен йышне кĕнĕ. Вĕсем пурте Елчĕк шкулĕнчен. Çак тĕслĕхсем тулли комплектлă классенче вĕренекенсен пĕлÿ шайĕ пысăк пулнине кăтартса параççĕ.
Елчĕк районĕ кăçал та предметсен олимпиадинче яллă районсем хушшинче республикăра иккĕмĕш вырăн йышăнма пултарни пысăк çитĕнÿ шутланать.
Район администрацийĕн пуçлăхĕн пĕрремĕш çумĕ районти педагогсен ăсталăхне палăртакан конкурссем çинче чарăнса тăчĕ. «Çулталăкри воспитатель» ята «Шевле» ача сачĕн музыка ертÿçи Алина Молодова, «Чи лайăх класс ертÿçи» ята Кушкă шкулĕнчи Людмила Пешенькова, «Çулталăкри вĕрентекен» ята Çĕнĕ Пăва шкулĕнчи Алексей Смирнов çĕнсе илнĕ.
Леонард Левый кăçал 11-мĕш тата 9-мĕш классенче вĕренекенсене экзаменсем тыттарас, тирпей-илем кĕртес, Аслă Çĕнтерÿ кунĕнче «Вилĕмсĕр полк» акци ирттерес ыйтусем çинче чарăнса тăчĕ.
Район администрацийĕн пуçлăхĕн çумĕ - финанс пайĕн начальникĕ Галина Анисимова районăн пĕрлештернĕ бюджетне пĕрремĕш кварталта мĕнле пурнăçланипе паллаштарчĕ. Çак вăхăтра бюджета 63107,9 пин тенкĕ пырса кĕнĕ, расхутсем 66621,3 пин тенкĕпе танлашнă. Çав шутран 17361,8 пин тенки - хамăрăн тупăшсем. Ку енĕпе плана 102,7 процент тултарнă.
Район администрацийĕн ЗАГС пайĕн ертÿçи Наталия Баймушкина демографи лару-тăрăвĕ çинче чарăнса тăчĕ. Кăçалхи 3 уйăхра 32 ача çуралнă /пĕлтĕр 26/, 95 çын вилнĕ, 12 çемье чăмăртаннă.
Канашлура район пурнăçĕпе çыхăннă ытти ыйтусене те сÿтсе явнă.