12 апреля 2017 г.
2016 çулта пурнăçланă пысăк ĕçсенчен пĕри - Пĕтĕм Раççейри ялхуçалăх çыравне ирттерни. Çĕршывшăн пысăк пĕлтерĕшлĕ мероприятие тивĕçлĕ шайра ирттерес тĕллевпе районта 27 çын ĕçленĕ.
Елчĕк район администрацийĕнче çак кунсенче Чăвашстат представителĕсемпе çыравçăсем тĕл пулнă. Елчĕк район администрацийĕн пуçлăхĕн пĕрремĕш çумĕ Леонард Левый тĕлпулăва уçнă май çырав ирттерессинче яваплăха туйса ĕçленĕ кашни çыннах тав сăмахĕ каланă. Тав сăмахĕсен çумне Чăвашстатăн ертÿçин çумĕ Любовь Петрова, Чăвашстатăн ялхуçалăх тата тăван тавралăх статистикин уйрăмĕн начальникĕ Эмма Егорова, Пĕтĕм Раççейри ялхуçалăх çыравне ирттерессипе районти яваплă уполномоченнăй Людмила Горшкова хутшăннă.
Тĕлпулура 10 çынна Федерацин патшалăх статистикин службин ведомство мухтав паллипе - «Пĕтĕм Раççейри ялхуçалăх çыравне ирттерме хутшăннă ĕçсемшĕн» медальпе чысланă.