08 апреля 2017 г.
Районта экологи субботникĕсем пуçланчĕç.
Производство кăтартăвĕсемпе те яланах малти пулма хăнăхнă «Комбайн» ялхуçалăх производство кооперативĕнче экологи субботникĕсене йĕркелесе ирттересси, унта ушкăнпа, кар тăрса хутшăнасси те иртнĕ çулсенчен тытăнсах йăлана кĕнĕ.
Акана хутшăнакан ялхуçалăх техникине тĕплĕн юсаса хатĕррисен ретне лартнă хыççăн механизаторсем, Владислав Степанов çамрăк бригадир ертсе пынипе, виççĕмĕш комплекслă бригадăн столовăйĕ вырнаçнă территорире юр ирĕлнĕ май куç умне тухнă çÿп-çапа пухса тирпейленĕ. Унсăр пуçне, юлашки çулсенче çак территорире вĕрене йывăççисем те ытла çÿллĕ ÿссе кайнă пулнă. Хĕлле, ĕçрен пушăрах вăхăтра, вĕсене вутă валли каснă. Юр ирĕлнĕ хыççăнах çак вырăна та тасатса тирпейленĕ. Çанталăк ăшăтсанах кунта йывăçсен çĕнĕ хунавĕсене лартса хăварма, чечексем акма, картасене сăрлама - вĕсене çĕнĕ тĕс кĕртме шутлаççĕ.
С.АНАТОЛЬЕВА.