05 апреля 2017 г.
Район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе тунтикун ирттернĕ канашлура çак ыйту тĕп вырăнта пулнă.
Ачасен çуллахи канăвне мĕнле йĕркелессипе район администрацийĕн пуçлăхĕн пĕрремĕш çумĕ - вĕренÿ тата çамрăксен политикин пайĕн начальникĕ Леонард Левый каласа пачĕ. Çак тĕллевпе район бюджетĕнчен 931 ачана çуллахи каникул кунĕсенче канма 1861 пин тенкĕ уйăраççĕ. Çав шутран 31 ачана хула тулашĕнчи лагерьсене /360 пин тенкĕлĕх/, 671 ачана шкул çумĕнчи лагерьсене /1199 пин тенкĕлĕх/, 229 ачана палатка лагерĕсене /302 пин тенкĕлĕх/ явăçтармалла. Хула тулашĕнчи лагерьсенчи кану смени 21 куна тăсăлать, путевка 13767 тенкĕ, профиль /экологи, çарпа патриот тата ытти те/ лагерĕсенче 15141 тенкĕ тăрать.
Апрелĕн 1-мĕшĕнче хула тулашĕнчи лагерьсенче канма автоматизациленĕ майпа заявкăсем йышăнасси пуçланнă. Вăл май уйăхĕн 31-мĕшĕччен 4 тапхăрпа пырать. Районта заявкăсене апрелĕн 22-мĕшĕнчен пуçласа йышăнаççĕ. Ашшĕ-амăшĕсене кашни шкулта ятарлă оператор çырăнма пулăшать.
Леонард Левый палăртнă тăрăх, çуллахи каникул вăхăтĕнче ачасен канăвне йĕркелессипе ытти ведомствăсем те ĕçлеççĕ. Акă, Чăваш Республикин Ĕçлев министерствин халăха социаллă пулăшу паракан Елчĕк районĕнчи центрĕ хула тулашĕнчи тата шкул çумĕнчи лагерьсенче канма 128 путевка уйăрать. Унта нумай ачаллă тата тулли мар çемьесенче, сахал тупăш илекен çемьесенче çитĕнекен ачасем канĕç. Чăваш Республикин Сывлăх сыхлавĕн министерствин Елчĕк районĕнчи тĕп больници сывлăх тĕлĕшĕнчен япăх çитĕнекен 52 ачана сипленме путевкăсем уйăрать. Халăха ĕçпе тивĕçтерекен районти центр сахал тупăш илекен, тулли мар тата нумай ачаллă çемьесенче çитĕнекенсене укçа ĕçлесе илме вăхăтлăха ĕçе вырнаçтарать. Çÿлерех асăннă лагерьсенче ачасен канăвне тивĕçлипе йĕркелес тĕлĕшпе хатĕрленÿ ĕçĕсем пуçланнă ĕнтĕ.
«Патшалăх тата муниципалитет пулăшăвĕсем парас тĕлĕшпе ĕçлекен нумай функциллĕ центр» автономи учрежденийĕн директорĕ Людмила Викторова центрăн кăçалхи пĕрремĕш кварталти ĕçĕ-хĕлĕпе паллаштарчĕ.
Канашлура çавăн пекех районта тухса тăракан «Елчĕк ен» хаçата 2017 çулхи иккĕмĕш çур çулта çырăнса илес, районти ялсем хушшинчи муниципалитет маршручĕсемпе автобуссем çÿретес, ĕçмелли шывпа тивĕçтерекен башньăсене йĕркеллĕ тытса тăрас тата лицензи илес ыйтусене те хускатнă.