05 апреля 2017 г.
Юлашки çулсенче хĕрарăм чирĕсем ÿссех пыраççĕ. Вĕсен шутне эндометриоз, матка çинче ÿсекен миома, менструаци çаврăмĕ пăсăлни, ар çыхăнăвĕ урлă ерекен инфекци чирĕсем кĕреççĕ. Çамрăк хĕрарăмсем çие юлманнипе час-часах нушаланаççĕ.
Юлашки çулсенче кăкăр чирĕсем ÿссе пыни те пăшăрхантарать. Кашни виççĕмĕш хĕрарăм тенĕ пек çак йывăрлăх умне тухса тăрать. Мăнтăрланни, уйăх хушшин çаврăмĕ пăсăлни, ача çуратайманни, тин çуралнă пепкене кăкăр çитерменни, час-часах хытă пăлханни, çутçанталăк тасамарланни сывлăхшăн питĕ сиенлĕ. Çавăнпа та кашни хĕрарăмăн кăкăрне тытса тĕрĕслеме пĕлмелле. 36 çула çитичченхи хĕрарăмсен кашни çул ăна УЗИ пăхтармалла. 36-50 çулхисен икĕ çулта пĕрре, 50-ран иртнисен кашни çул маммографи тĕрĕслевĕ витĕр тухмалла.
Хĕрачасенчен пуçласа ватă хĕрарăмсем таранчченех çулталăкра икĕ хутран кая мар тухтăр патĕнче тĕрĕсленмелле. Гинеколог патне каймалли сăлтавсем: хырăм айĕ тата кăкăрсем ыратни, менструаци циклĕ йĕркеллĕ килменни, ар органĕсем патĕнче чĕпĕтсе е кĕçĕтсе тăни, лайăх мар шĕвексем тухни.
Тухтăрпа тĕл пулма хатĕрленсе кайма тăрăшмалла:
- уйăх хушши пĕтнĕ хыççăн кайсан авантарах;
- икĕ-виçĕ кун маларах ар çыхăнăвне кĕмелле мар;
- йышăнăва кĕрес умĕн уйăх хушши хăçан пулнине, мĕнле чирсемпе чирленине аса илмелле;
- шкула çÿрекен хĕрачана амăшĕ тĕрĕслев пирки ăнлантарса памалла.
Çакна асра тытар: врач патĕнче сывлăха тăтăшах тĕрĕслеттерни хĕрарăмшăн, пулас амăшĕсемшĕн уйрăмах питĕ усăллă.
И.СМИРНОВА,
акушер-гинеколог.