29 марта 2017 г.
Пĕтĕм тĕнчери театр кунне халалласа Елчĕкри культура çурчĕн сцени çинче районти 12 драма коллективĕ хăйсен пултарулăхне кăтартрĕ.
Уявпа ялти артистсемпе куракансене район администрацийĕн культура тата информаципе тивĕçтерекен пай начальникĕ А.Александрова, республикăри халăх пултарулăхĕн центрĕн театр ушкăнĕсемпе ĕçлекен методисчĕ, Чăваш Республикин тава тивĕçлĕ артисчĕ В.Григорьев саламларĕç.
Фестиваль-конкурс чыславран пуçланчĕ. Елчĕк шкулĕнчи кадет класĕнче вĕренекен Катя Цыганова Раççей шайĕнчи «Талантсен калейдоскопĕ» конкурса хутшăннă. Сăвă вуласа республикăра пĕрремĕш вырăна тухнă. Шупашкартан килнĕ хăна ăна конкурс призне тата çĕнтерÿçĕ дипломне парса чыс турĕ. Катя куракансене сăввипе паллаштарчĕ. Чăннипех те чуна пырса тивмелле вуларĕ вăл ăна. Вăрăмхăвари Елизавета Казначееван пултарулăхĕ те тĕрлĕ енлĕ. Вăл иртнĕ çул сăвă вуласа Хусанта палăрнă. Хальхинче мĕн пĕчĕкрен сцена çинчен анман хĕрача сценкăра питĕ ăста, тепĕр артистран кая мар пулнине çирĕплетрĕ.
Тĕрлĕ пьесăсен сыпăкĕсене, сценкăсене курса ларма кăмăллă пулчĕ. Пĕрисем сценкăна иккĕн е виççĕн выляççĕ пулсан, Тÿскелти «Шуçăм» фольклор ушкăнне çÿрекенсем спектакль лартма та пурте хутшăнчĕç. Елчĕкри халăх театрĕ, Çĕнĕ Пăвари, Çирĕклĕ Шăхалĕнчи, Аслă Пăла Тимешри, Кĕçĕн Таяпари, Çĕнĕ Эйпеçри, Аслă Таяпари, Тăрăмри драма коллективĕсем ăсталăха çулран-çул ÿстерсе пыни курăнчĕ. Рольсене лайăх калăплакансем тĕрлĕ номинаци çĕнтерÿçисем пулса тăчĕç. В.Григорьев артист кашни коллективăн ĕçĕсемпе тĕплĕн паллашнă хыççăн мастер-класс ирттерчĕ.
В.АЛЕКСЕЕВА.