29 марта 2017 г.
Халăха ĕçпе тивĕçтерекен районти центр ĕçченĕсем 14-18 çула çитнĕ ачасене çуллахи каникул тата вĕренÿрен пушă вăхăтра ĕçе вырнаçтарасси çине яланхи пекех пысăк тимлĕх уйăраççĕ.
Ачасен пушă вăхăчĕ сахал пулни вĕсене урамра çапкаланса çÿресрен, преступлени тăвассинчен, наркомани çулĕ çине тăрассинчен сыхлать. Унсăр пуçне, хăйсем тĕллĕн укçа ĕçлесе илме пултарни вĕсене хавхалантарать, хăйсене мăнаçлă, çитĕннĕ çын пек туйма хистет.
Ачасене каникул вăхăтĕнче ĕç тупма пулăшассине эпир хамăрăн тĕп тивĕçсенчен пĕри тесе шутлатпăр. Çак тĕллевпе «14 çултан пуçласа 18 çула çитичченхи çул çитмен граждансене каникул вăхăтĕнче тата вĕренÿрен пушă вăхăтра вăхăтлăх ĕçпе тивĕçтерессине йĕркелесе пырасси» программăна патшалăх, обществăлла организацисен витĕмĕпе, паллах, ĕç паракансем пулăшнипе ăнăçлă ĕçе кĕртсе пыратпăр. Çула çитмен çамрăксене вăхăтлăха ĕçе вырнаçтарнă чухне вĕсем мĕнле çемьере çитĕннине шута илетпĕр. Сахал тупăшлă, тулли мар, нумай ачаллă çемьесенчи ачасене чи малтан ĕçе вырнаçтарма тăрăшатпăр. Çапла майпа 2016 çулта ĕç паракансемпе 34 килĕшÿ çирĕплетсе 384 ачана ĕçе вырнаçтарнă. Урăхла каласан, районĕпе илсен шутланакан çак çулсенчи 624 ачан 61 процентне ĕçе вырнаçтарма май килнĕ. Вĕсене ĕç укçи тÿлеме район бюджетĕнчен 53,3 пин тенкĕ, республика бюджетĕнчен 166,63 пин тенкĕ уйăрнă. Ачасен ытларах пайĕ «Комбайн», Ленин ячĕллĕ ЯХПКсенче тата Елчĕкри çăкăр пĕçерекен заводра вăй хунă. Çула çитмен ачасене вăхăтлăх ĕçе вырнаçтарма пулăшнăшăн çак предприятисен ертÿçисене тав тăватпăр. Çакăнтан пысăк тупăш илес çуккине пĕлсе тăнă çĕртенех вĕсем ачасене пулăшма пулчĕç. Ачасем - пирĕн пуласлăх, çитĕнекен ăрăва ĕçре пăрремĕш утăмсем тума хăнăхтарасси пиртен, аслисенчен килет.
М.ВАСИЛЬЕВА,
халăха ĕçпе тивĕçтерекен районти центр директорĕ.