25 марта 2017 г.
Кĕçĕн Таяпари Геннадий Изосимова нумайранпа пĕлетĕп. 1976 çулта ĕнерхи водителе культура çуртне ертсе пыма шанчĕç. Вăл çулсенче ялта культура вучахĕ ялкăшса тăратчĕ.
Чи малтанах Герман Герасимовпа иккĕшĕ хор йĕркелерĕç. 1978 çулхи районти ĕçпе юрă уявĕнче хор пултарулăхне пысăка хурса хакларĕç. Кĕçĕн Таяпасем хор валли кĕпесем çĕлетме укçа-тенкĕ уйăрчĕç. Сцена кĕписем çĕлеттерес тесен малтан эскизне Чăваш драма театрĕн художникне заказ парса тутарчĕ Геннадий Александрович. Çав эскизпа Харьков хулине кайса заказ парса килчĕ. Арçынсен 10, хĕрарăмсен 15, ташлакансен 10, вокалпа инструментсен ансамблĕ валли 5 кĕпе комплекчĕсем янă посылкăсем пĕрин хыççăн тепри килчĕç, анчах ташламалли кĕпесем çук та çук. Тепĕр хут Харьков хулине çул тытрĕ культработник. Материалсем пулманран вăхăтра çĕлесе парайман иккен. Каярах кăна килчĕç çав костюмсем.
Çавăн хыççăн халăх йышлăн çÿрерĕ культура çуртне. Лев Морозов тăрăшнипе вокалпа инструмент ансамблĕн пултарулăхĕ тавра яла саланчĕ. Владислав Морозов, Вениамин Сергеев, унăн мăшăрĕ Людмила конферансье, Татьянăпа Павел Морозовсем /пĕртăвансем/ районти, кÿршĕ районсенчи, Тутар Республикинчи ялсенче вун-вун концерт лартатчĕç. Геннадий Александрович юрăçсене транспортпа тивĕçтеретчĕ. Колхоз председателĕ Алексей Головин та ялти артистсене яланах пулăшу аллине тăснă.
Вăл вăхăтри конкурссем, тĕлпулусем яланах асра. Хамăр çамрăк пулнăран кашни каç уяв пек иртетчĕ. «Выля, хут купăс» конкурсра урампа урам ăмăртатчĕ. «Калча» агитбригада çуракинче, ĕççинче юрă-ташăпа, шÿтсемпе савăнтаратчĕ. Чи малта пыракан комбайнер-тракторист çинчен «Боевой листокра» çутататчĕ вăл. Геннадий Изосимов художник-оформитель ĕçне те тивĕçлипе туса пыратчĕ.
Ю.ЧЕРНОВ.