22 марта 2017 г.
Виçĕ çул каялла, 2014 çулхи мартăн 18-мĕшĕнче, Крым çурутравĕ Раççее çĕнĕрен таврăнчĕ.
2014 çулхи мартăн 16-мĕшĕнче историшĕн питĕ пысăк пĕлтерĕшлĕ референдум иртрĕ - Крым Раççей çунатти айне таврăнма кăмăл турĕ. Çак кĕске вăхăтра унта пурăнакансен пурнăçĕ палăрмаллах лайăхланнă: çынсем валли ĕç вырăнĕсем йĕркеленĕ, ял-хулана патшалăх енчен пысăк пулăшу кÿнĕ. Чăваш Ен Крымпа нумай килĕштерсе ĕçлет. Виçĕ çул каялла Сочири инвестици форумĕнче суту-илÿ, экономика, наука, культура тытăмĕсенче килĕштерсе ĕçлеме икĕ енлĕ килĕшÿсем тунă. Республикăри нумай предприяти Крыма хăйĕн продукцийĕпе тивĕçтерет. «Шупашкар-Симферополь» маршрутпа самолет вĕçет. Чăваш ачисем Крым çурутравĕ çинчи «Артек» лагерьте канаççĕ, çавăн пекех кунта пурăнакан чăвашсен Акатуйĕ те кĕрлерĕ. Вĕсем вара кунта сахал мар - хальхи вăхăтра Крымра 4 пине яхăн, ытти çăлкуçа ĕненес пулсан 6 пинрен те иртет мĕн...
Çак пысăк пĕлтерĕшлĕ пулăма паллă туса 3-мĕш çул Пĕтĕм Раççейĕпех уяв иртет. Иртнĕ шăматкун Шупашкарти Республика лапамĕнче «Эпир пĕрле» чаплă концерт пулнă. Савăнăçлă уява ЧР Министрсен Кабинечĕн Председателĕн çумĕ - ЧР Пуçлăхĕн Администрацийĕн ертÿçи Ю.Васильев, ЧР Патшалăх Канашĕн депутачĕ, «Единая Россия» политика партийĕн Чăваш Енри уйрăмĕн секретарĕ Н.Малов, Шупашкар хулин ертÿлĕхĕ, общество организацийĕсен, тĕрлĕ партисен, ĕç коллективĕсен представителĕсем, вĕренекенсемпе студентсем, пенсионерсем йышлăн хутшăннă.