22 марта 2017 г.
Ялхуçалăх предприятийĕсемпе хресчен /фермер/ хуçалăхĕсенче çурхи уй-хир ĕçĕсене пурнăçлама мĕнле хатĕрленнине районти комиссипе тĕрĕслесси малалла пырать.
Çурхи кун çулталăк тăрантарнине асра тытса çĕр ĕçченĕ яваплă ĕçе пурнăçлама тĕплĕн хатĕрленнине хамăр куçсемпе курса ĕненетпĕр. Малтанхи кунсенче комиссипе пулса курнă Ленин ячĕллĕ ялхуçалăх призводство кооперативĕпе Аслă Елчĕк ял тăрăхĕнчи ÿсен-тăран культурисене çитĕнтерессипе тимлекен Владимир Чернов, Валерий Падуев, Николай Светлов, Геннадий Афанасьев хресчен /фермер/ хуçалăхĕсен, «Труд» ялхуçалăх производство кооперативĕпе «Эмметево» ООО тĕслĕхĕсем те çакна уççăнах çирĕплетсе параççĕ.
Уйрăммăн палăртса калас пулсан, Ленин ячĕллĕ ялхуçалăх производство кооперативĕнче юлашки çулсенче техника паркне тĕпрен çĕнетсе улăштарма вăй çитерни, пусă çаврăнăшне кирлĕ пек йĕркелесе пырассине, чи лайăх вăрлăхсемпе усă курассине тĕп тивĕç вырăнне хуни - ырă пулăм. Ку чухнехи хăватлă техникăпа усă курни, паллах, уй-хирти ĕçсене агротехника хушнă чи кĕске вăхăтра пурнăçлама, ĕç тухăçлăхĕпе пахалăхне палăрмаллах ÿстерме май парать. Кăçал та ялхуçалăх машинисене темиçе туяннă, КС-8 йышши культиватор, КЗС-6-01 маркăллă каток та çак шута кĕреççĕ. Хальхи вăхăтра кунта акана хутшăнакан пĕтĕм техникăна хатĕррисен ретне лартнă, вĕсен кашнийĕн хăйĕн шанчăклă хуçи пур. Çунтармалли-сĕрмелли материалсемпе, пахалăхлă вăрлăхпа туллин саппасланнă. Черетлĕ çуракире усă курма элита репродукцири Раушан сортлă урпа вăрлăхне 80 тонна кÿрсе килнĕ.
Аслă Елчĕк ял тăрăхĕнчи ытти фермерсемпе танлаштарсан чи пысăк çĕр лаптăкĕпе усă куракан Владимир Чернов та, кашни çулхи пекех, çуркуннехи уй-хир ĕçĕсене пурнăçлама тĕплĕн хатĕрленнĕ. Техника, механизаторсем тĕлĕшĕпе чăрмав пулмалла мар. Çунтармалли-сĕрмелли материалсем, минераллă удобренисем кÿрсе килес ĕçе те юлашки вăхăта хăварман. Кĕр тыррисен лаптăкĕ 100 гектар йышăнать. Унсăр пуçне, 400 гектара яхăн акса хăварма палăртнă пĕрчĕллĕ тата пăрçа йышши культурăсен вăрлăхĕсене те ытлашшипех хатĕрленĕ - ака стандартне туллин тивĕçтерет.
«Труд» ялхуçалăх производство кооперативĕнчи механизаторсем пурте хăйсен ĕç вырăнĕсенче пулчĕç. Вĕсемпе пуринпе те уйрăммăн паллашма тÿр килчĕ. Евгений Козлов, Владимир Козлов, Валерий Баранов, Петр Иванов, Владимир Григорьев, Геннадий Александров, Константин Марков, Юрий Уткин механизаторсемпе Венекдит Львов, Алексей Воронов водительсен кăмăлĕ çурхи кун пекех хаваслă. Хавхалануллă кăмăллă пулма вĕсен сăлтавĕ те пур. Ĕçе пĕлсе йĕркеленине пула ялхуçалăх предприятийĕнче тыр-пул тухăçĕ кашни çул ÿссе пырать. Уй-хирти ĕçсене пурнăçлассинче çĕнĕ техникăпа ытларах усă курма тытăнни те вĕсене мал ĕмĕтлĕ пулма хистет. Кăçал та СЗТ-5,4 йышши сеялка туянма май килнĕ. Валерий Германов председатель юлашки çулсенче кÿрсе килме вăй çитернĕ пур пек техникăпа пĕлсе усă курмаллине, малашне ытти тĕллевсене пурнăçа кĕртессипе тимлеме кирлине палăртрĕ.
Çураки вĕçленнĕ хыççăнах пикенмелли пысăк ĕç - фермăри пăру витине тĕпрен реконструкци тума тытăнасси. Укçа-тенкĕ пирки сăмах тухнă май Валерий Иванович Елчĕкри сыр пĕçерекен завод тулли хăватпа ĕçлеме пуçлани ялхуçалăх предприятийĕсемшĕн те мĕн тери меллĕ, усăллă пулни çинче чарăнса тăчĕ. Заводăн çĕнĕ хуçи Руслан Каштанов халĕ ялхуçалăх предприятийĕсене малашне сутакан чĕртаваршăн малтанах татăлма - укçа парса хума та пултарать. Кун пекки хăçан пулнине те манса кайнă!
Тĕмерсем черетлĕ ялхуçалăх çулталăкĕнче производство планĕпе килĕшÿллĕн ялхуçалăх культурисене пĕтĕмпе 1360 гектар, çав шутран пĕрчĕллĕ тата пăрçа йышши культурăсене 610 гектар çинче акса хăварма палăртаççĕ. Хăш-пĕр вăрлăхсене çĕнетме те шутланă, ăна çитес кунсенчех 50 тоннăран кая мар кÿрсе килме калаçса татăлнă.
Юрий Лапшин ертсе пыракан «Эмметево» ОООри техника паркĕ çак вăхăтчен те пуян пулнă. Кăçал вара ака комплексĕ те /К-700 хăватлă трактор, культиваторпа плуг, дискатор – пурĕ 11 миллион тенкĕлĕх/, унсăр пуçне, тĕш тырă тиекен погрузчик, косилка туяннă. Акана кĕске вăхăтра тата пысăк пахалăхпа ирттерме кунта мĕнпур енĕпе илсен те, тĕплĕн хатĕрленнĕ. Çунтармалли-сĕрмелли материалсем çителĕклĕ, минераллă удобренипе туллин саппасланнă - вăл ялхуçалăх культурисен пĕтĕм лаптăкне апатлантарма çитет. Анасем çинчен тата кăштах юр ирĕлсенех кĕр тыррисене /350 гектар/, нумай çул ÿсекен курăксене /120 гектар/ минераллă удобренипе апатлантарма тухмалла. Çак ĕçе «Туман» йышши агрегатпа усă курса пурнăçлама палăртнă.
Çĕнĕ вăрлăхсем пирки те манса кайман. Курнавăшри Юрий Цветков хресчен /фермер/ хуçалăхĕнчен 30 тонна Ульяновский-100 элита репродукцири вăрлăх туяннă. Çĕнĕ вăрлăхсене ĕçе кĕртесси çине малашне тата ытларах тимлĕх уйăрма кирлине те лайăх ăнланаççĕ.
Тĕп инженер тивĕçĕсене пурнăçлакан Геннадий Горшковран ака ĕçĕсене пурнăçлама хутшăнакан механизаторсене ятран палăртса калама ыйтрăмăр. Вĕсем: Александр Иванов, Вячеслав Львов, Венарий Захаров, Виталий Аверьянов, Сергей Аверьянов, Алексей Алексеев, Олег Лапшин, Николай Карсаков. Акаçи умĕн уй-хир хуçисене хавхалантарни вырăнлă та...
Светлана АРХИПОВА.
Валерий Германов председателĕн /сылтăмри/ ака умĕн механизаторсемпе канашламалли, сÿтсе явмалли сахал мар. Геннадий Александров, Валерий Баранов, Алексей Воронов механизаторсемпе пулсан вара - шанчăклă, вĕсем кирек хăш ĕçе те тÿрĕ кăмăлпа пурнăçланипе палăрса тăраççĕ.