22 марта 2017 г.
Ача-пăча сассипе кулли янăраса тăракан килте пурнăç илемĕ, интересĕ, тĕллевĕ пур. Хĕрарăм телейĕ – ачара теççĕ. Анчах та хăшĕ-пĕри темĕн пек тăрăшсан та пепкене кун çути кăтартса алла илеймест. Çавăнпа патшалăх ача амăшĕн сывлăхĕшĕн нумай тăрăшать. Ку енĕпе республикăра та пысăк утăмсем тăваççĕ. Иртнĕ çулхи чÿк уйăхĕнче Шупашкарта Раççейри ыркăмăллăх фончĕ йĕркеленĕ «Уçă университет» проектпа регионсен хушшинчи наукăпа практика конференцийĕнче Раççей тĕп акушер-гинекологĕ Лейла Адамян шăпах хĕрарăм чирĕпе асапланакансене, ача çуратайманнисене тÿлевсĕр консультаци пачĕ.
Паян ЭКО мелĕпе ача çуратнине илтмен хĕрарăм çук та пулĕ. Çак мелпе 1978 çулта пĕрремĕш пепке çуралнă. Унтанпа тĕнчери 7 миллион ача ЭКО мелĕпе çут тĕнчене килнĕ. Ку енĕпе пирĕн çĕршывра та ăнăçлă ĕçлеççĕ. Çак ачасем ыттисенчен нимĕнпе те уйрăлса тăмаççĕ. Пирĕн районта та ЭКО мелĕпе çуратнă ачасем пур.
Хĕрарăмсене ырă хыпар пĕлтерме питĕ хавас. Района ЭКО мелĕпе çуратма кăмăл тăвакансене пулăшас тĕллевпе патшалăх 17 квота тÿлевсĕр уйăрса панă. Çавăнпа та ача çуратас текен çамрăк мăшăрăн терапевт патĕнче сывлăхне тĕрĕслеттерсе ЭКО мелĕпе ача çуратас кăмăллине пĕлтермелле. Терапевт ача çуратма сывлăхлине пĕлтерсен районти акушер-гинеколог патне килмелле, тĕплĕ тĕрĕслев витĕр тухса анализсем памалла. Сывă çамрăк хĕрарăма республикăри перинаталь центрне яратпăр.
Çамрăк мăшăрсем! Енчен те эсир ЭКО мелĕпе ача çуратас тетĕр пулсан сире патшалăх шанчăк парать. Унпа усă курмаллах.
Н.ЕГОРКИНА,
районти акушер-гинеколог.