22 марта 2017 г.
Урампа шухăша кайса утса пыратăп. Акă, ачине алăран çавăтнă амăшĕ шăкăл-шăкăл калаçса иртет, ашшĕ ывăлне велосипедпа ярăнма вĕрентет, асламăшĕ мăнукне садикрен çавăтса таврăннă май унăн чĕвĕл-чĕвĕл калаçăвне итлесе пырать... Ачалăх тесен кашнийĕн пурнăçри чи телейлĕ те хаваслă тапхăр куç умне тухса тăрать. Анчах кашни пепкенех çывăх çыннисем çумĕнче, вĕсен ăшшипе хÿтлĕхĕнче ÿсме тивмест çав. Хăш-пĕр ашшĕ-амăшĕшĕн эрех хăй пурнăç панă тĕпренчĕкĕсенчен те хаклăрах. Ун пек ачасем ашшĕ-амăшĕ пур çинчех тăлăх ÿсеççĕ, интерната лекеççĕ. Ырă чун-чĕреллĕ çемьесем, ют ачасем пулмаççĕ текенсем, интернатра ÿсекен ачасене шеллесе тăван кил ăшшине парнелеççĕ.
Тăван ашшĕ-амăшĕн тимлĕхĕсĕр юлнă ача-пăча интересĕсене хÿтĕлес, вĕсене социаллă тимлĕх уйăрас тĕлĕшпе патшалăх шайĕнче тĕллевлĕ ĕç пурнăçланать. Районта ачасем усрава илнĕ çемьесемпе тĕрлĕ конкурс-тĕлпулусем йĕркелесси ырă йăлана кĕнĕ. «Улăп» физкультурăпа спорт комплексĕнче çемьесене ылмаштаракансемпе «Чи лайăх спорт çемйи» ăмăрту хаваслă иртрĕ. Унта Кипеçри Александровсен, Аслă Пăла Тимешри Портновсен, Аслă Таяпари Капитоновсен, Кивĕ Эйпеçри Никифоровсен, Хăвăлçырмари Семеновсен, Кавалти Анисимовсен çемйисем хутшăнчĕç. Çемьесем тĕрлĕ тупăшусем витĕр ăнăçлă тухрĕç. Кашнийĕшĕ тĕрлĕ номинацин çĕнтерÿçи пулса тăчĕ. Чи хаклă приза - гимнастика тумалли оборудование Портновсен çемйи тивĕçрĕ. Ыттисем те парнесĕр юлмарĕç. Конкурса Зарема Князевăпа Петр Смирнов юрăсемпе илем кÿчĕç.
Чи кирли - çакăн пек тĕлпулусенче ача усрава е опекăна илнĕ çемьесем пĕр-пĕринпе хутшăнни, пĕр-пĕрин паха опычĕпе паллашни, ачасем пĕр-пĕрин пурнăçĕпе кăсăкланни.
Г.ОСИПОВА.