18 марта 2017 г.
«Энтепе» ялхуçалăх предприятийĕнче вăй хуракансене умри йывăрлăхсем хăратмаççĕ, çапла майпа кунта производство, экономика кăтартăвĕсем çулсерен ÿссех пыраççĕ.
Черетлĕ ялхуçалăх çулталăкĕнче пурнăçламалли тĕллевсем те пысăк.
- Чи лайăх ĕçлекенсемпе танлашмалла. Малашне выльăх-чĕрлĕхрен туса илекен продукцин калăпăшне, унăн пахалăхне тата ÿстермелле, уйрăмах пĕр ĕнерен сĕт сăвассине тивĕçлĕ шая çитерме кирлине ăнланатпăр. Унсăр пуçне пусă çаврăнăшне кирлĕ пек йĕркелесе пымалла. Мĕншĕн тесен ÿсен-тăран тата выльăх-чĕрлĕх отраслĕсем пĕр-пĕринпе тачă çыхăннă, - тет Андрей Васильев директор.
Хальхи вăхăтра, пушшех, ялхуçалăх предприятийĕнчи механизаторсем канăçĕсене çухатнă: юлнă вăхăтпа усă курса вĕсем акана хутшăнакан ялхуçалăх машинисене уй-хире илсе тухма хатĕрлессипе тимлеççĕ. Тракторсемпе прицепсене графикпа килĕшÿллĕн çитес кунсенчех патшалăх техника тĕрĕслевĕ витĕр кăлармалла. Çунтармалли-сĕрмелли материалсемпе, минераллă удобренисемпе саппасланаççĕ.
Сăнÿкерчĕкри Владимир Мезейкин, Александр Баскаков, Владимир Сапожников, Евгений Савельев механизаторсене кашни çул чи яваплă ĕçе - ака тума, тыр-пул пухса кĕртме шанаççĕ. Шанчăка тивĕçлипе тÿрре кăларакан ĕçченсене дирекци енчен те пĕрре анчах мар хавхалантарнă. Ял малашлăхĕ, чăннипех, çамрăксенче тата унăн теветкеллĕ те хăюллă çыннисенче. Çакна тĕпе хурса «Энтепе» ООО ертÿлĕхĕ Евгений Савельев çамрăка ятарлă професси пĕлĕвĕ илме пулăшнă. Евгений хăй те кăмăллă, «хурçă ут» çÿретекен çынсен ĕçне курса çитĕннĕ ял ачи механизатор профессийĕ сумлă та пархатарлă пулнине йышăнать.
- Тăван ялран хакли урăх çук. «Вăрăм укçа» шыраса тĕнче тăрăх çÿресе вăхăта сая яриччен ялтах ĕçлесе пурăнатăп», - тет вăл. Чăн сăмахсем çумне урăх мĕн хушса калăн?
Ял малашлăхĕ мĕнле пуласси унăн çыннисенчен нумай килет. Валентина Михайлова /сылтăмри сăнÿкерчĕкре/ вара кунта доярка пулса вăй хурать. Пархатарлă ĕçĕшĕн ăна Чăваш Республикин Ялхуçалăх министерствин Хисеп грамотине парса чыс тунă.
Светлана АРХИПОВА.