15 марта 2017 г.
Юлашки вăхăтра районта туризма аталантарас тĕллевпе курăмлă ĕçсем туса пыма тăрăшатпăр. Ытларах пысăк пулăмсен туризмне, спорт, çутçанталăкри кану, велосипед, тĕнпе çыхăннă туризма, этнотуризма аталантарасси çине пысăк тимлĕх уйăратпăр.
Туризм пĕр куна е темиçе эрнене те тăсăлма пултарать. Ăна тĕрлĕ ÿсĕмри çынсем валли йĕркелетпĕр.
Районта шалти туризм начар мар аталаннă. Елчĕкри историпе тăван тавралăх халăх музейĕнче кашни уйăхрах çĕнĕ куравсем уçатпăр. Иртнĕ çул, калăпăр, 17 курав йĕркелеме пултартăмăр. Унта тĕрлĕ ăстасен, паллă çынсен ĕç-хĕлĕпе, пурнăçĕпе паллаштаратпăр. Çавăн пекех хамăрăн куравсемпе кÿршĕсем патне çÿрессине йăлана кĕртсе пыратпăр. Иртнĕ çул республикăри Акатуйра хамăр тăрăхри çи-пуçсене кăтартрăмăр. Хула çыннисемпе хăнасем анатри чăвашсен тумĕсемпе асăнмалăх сăн ÿкерттерчĕç, теприсем хамăр тăрăхпа паллаштаракан сувенирсене туянчĕç.
Кану туризмне çул уçса çуллахи вăхăтра шкул ачисемпе районти çутçанталăк палăкĕсем патне çитме тăрăшатпăр. Хамăрăн тĕпренчĕкĕмĕрсене паллă вырăнсемпе кăсăклантарассине, вĕсен пĕлтерĕшне тишкерессине тĕп вырăна хуратпăр. Çавăн пекех района килекен хăнасене те эпир хамăр енчи паллă вырăнсене илсе кайса кăтартатпăр.
Раççей шайĕнче иртекен «Ырă ĕç ту» акцие çулсеренех хутшăнатпăр. Ку енĕпе вĕренекенсем патĕнче пулатпăр.
Музейра «Чĕрĕ уроксем» ирттернине шкул ачисем кĕтеççĕ. Мастер-классенче кĕçĕн класс ачисем ал ĕçне хăнăхаççĕ. Вĕсем хăйсен аллипе ашшĕ-амăшне тĕрлĕ парнесем ăсталаса панинчен ырри мĕн пултăр!
Республикăри музейсен ырă опытне хамăр патăмăрта ĕçе кĕртессипе те тимлетпĕр. Комсомольскинчи «Çĕр тата çынсем», Кÿкеçри «Бичурин тата самана» музейсенче пулса вĕсен ĕç опычĕпе паллашрăмăр çеç мар, хамăрăн ĕç-хĕлпе те вĕсене кăсăклантартăмăр.
Маларахри çулсенче велосипед туризмне чĕртсе ярас тесе Аслă Таяпа хулашĕ патне çитсе килнĕ пулсан, пĕлтĕр район шайĕнче «Мăн асаттесен çул-йĕрĕпе» велочупăва халăх йышлă хутшăнни савăнтарчĕ. Ашшĕ-амăшĕпе пĕрле ача-пăча та велосипед çине ларса районти паллă вырăнсенче пулса курчĕ. Похода 300 ытла çын хутшăнчĕ. Елчĕксем велосипедпа ярăнма кăмăллаççĕ, çавна май велотуризма аталантарас енĕпе çĕнĕ проектсем хатĕрлес ĕç пырать.
Ял туризмне чĕртсе ярас тĕлĕшпе тĕрлĕ конкурссене хутшăнатпăр. Аваллăхсăр малашлăх çук теççĕ. Çавăнпа юлашки çулсенче халăх йăли-йĕркине тытса пырас тесе çамрăк мăшăрсен фотосессийĕсене музейра йĕркелесси ырă йăлана кĕчĕ. Эпир çамрăксене асаттесемпе асаннесенчен тăрса юлнă ырă йăла-йĕркепе тĕплĕн паллаштаратпăр, хăйсене аваллăха йыхравлатпăр, тĕрлĕ тупăшусене хутшăнтаратпăр.
Районта тĕлĕнмелле илемлĕ, кăсăклă, паллă вырăнсем йышлă. Вĕсене пурин те пĕлмеллех. Интернетра пĕтĕм Раççей туризмне кăтартакан «Путешествуй дома» портал пур. Эпир унта хамăр районпа паллаштаракан слайдсем вырнаçтартăмăр. Апла пулсан килте ларсах районта пулса иртекен пысăк пулăмсемпе паллашма май пур. Тĕнче шайĕнче йĕркеленĕ порталта пирĕн районпа кирек кам та паллашма пултарать. Килте ларсах турист пулма пултарни те аван.
С.ГОЛУБЕВА,
Елчĕкри историпе тăван тавралăх музейĕн заведующийĕ.