11 марта 2017 г.
Руль умĕнче - хĕрсем
Пĕтĕм тĕнчери Хĕрарăмсен кунĕ умĕн район администрацийĕнчи хĕрарăмсен канашĕ пĕрремĕш хут «Руль умĕнче - леди» авточупу йĕркеленĕ.
Авточупăва хутшăнакансене район администрацийĕн пуçлăхĕ Н.Миллин, район администрацийĕнчи хĕрарăмсен канашĕн ертÿçи Г.Анисимова саламланă, ăнăçу суннă. Çул-йĕр хăрушсăрлăхĕн йĕркисемпе полицин районти пайĕн сотрудникĕсем А.Воронцовпа П.Рубцов паллаштарнă.
Район администрацийĕн культура тата информаципе тивĕçтерекен пайĕн ертÿçи А.Александрова çак мероприятие района йĕркеленĕренпе 90 çул çитнине халалланине, малашне те Хĕрарăмсен уявĕ умĕн авточупу йăлана кĕрессе шанса тăнине палăртнă.
Авточупу районта çуралса ÿснĕ Совет Союзĕн Паттăрĕсен ячĕллĕ Елчĕкри урамĕсем тăрăх иртнĕ.
Сăнÿкерчĕкре: авточупăва хутшăннă Марина Хушкина.
Çемье çавăрни - 45 çул
Çак кунсенче Курнавăшри 3 çемье хăйсем пурнăç çулĕпе пĕрле утма пуçлани 45 çул çитнине уявланă.
Изосим Андреевичпа Светлана Ивановна Ефимовсем ĕмĕрне тăван шкулта ĕçлесе ирттернĕ. Вĕсем хĕрпе ывăл çуратса пурнăç çулĕ çине кăларнă. Тивĕçлĕ канура пулсан та мăнукĕсене пăхса çитĕнтерме пулăшаççĕ.
Алексей Тимофеевичпа Валентина Семеновна Ивановсем, çĕр ĕçченĕсем, икĕ хĕрпе пĕр ывăл пăхса çитĕнтернĕ. Вĕсем çĕршывăн тĕрлĕ кĕтесĕсенче ĕçлесе пурăнаççĕ.
Светопольскисен пурнăçĕ те тăван колхозпа çыхăннă. Тамара Ивановна техник-осеменатор, Василий Николаевич водитель пулса ĕçленĕ. Икĕ ывăлĕпе пĕр хĕрĕ пурнăç çулĕ çине тăнă.
Юбилей ячĕпе çемьесене Курнавăш ял тăрăхĕн пуçлăхĕн çумĕ В.Турхан, ялти хĕрарăмсен, ветерансен канашĕсен ертÿçисем Р.Горшковăпа Д.Смирнова саламланă.