11 марта 2017 г.
Çулсерен районта иртекен оборонăпа массăллă спорт уйăхлăхĕ шкулсенче вĕренекенсене, ĕçлекен çамрăксене Раççее юратма, патриотла туйăма аталантарма, сывă пурнăç йĕркине пăхăнма, çар, культура, истори еткерлĕхне пĕлме пулăшать.
Уйăхлăхра районта тĕрлĕ мероприяти ирттернĕ. Вĕренÿ организацийĕсенчи «Пур çакăн пек професси - Тăван çĕршыва хÿтĕлесси...» паттăрлăх урокĕсем, 1-4 классенче вĕренекенсен «Хаваслă стартсем», çамрăк армеецсен «Зарница», «Орленок» çар вăййисен малтанхи тапхăрĕ, 8-11 классенче вĕренекенсен «Айтăр-ха, арçын ачасем» вăййи, ÿкерчĕксемпе салам открыткисен «Тăван çĕршыв хÿтĕлевçине» конкурсĕсем, стена хаçачĕсем кăларни... - кашниех илĕртрĕ, çамрăксене хăйсен пултарулăхне кăтартма май уçса пачĕ.
Уйăхлăха пуçланă май, Елчĕкри пĕтĕмĕшле пĕлÿ паракан вăтам шкулта ачасемпе çамрăксен «Юнармия» çарпа патриотла юхăмăн пĕрремĕш слечĕ иртрĕ.
Шкул ачисем ыркăмăллăх акцийĕсене хутшăнчĕç. Çавăн пекех вĕсем Аттелĕхĕн Аслă вăрçин ветеранĕсене, инваличĕсене, тыл ĕçченĕсене, «хĕрÿ точкăсенче» çапăçусене хутшăннисене тĕрлĕ енлĕ пулăшрĕç. Ялсенчи обелисксене, палăксене, асăну хăмисене йĕркене кĕртрĕç.
Уйăхлăхра спорт мероприятийĕсене те чылай йĕркеленĕ. Вĕсене хутшăнакансем хăйсен активлăхĕпе палăрчĕç.
Спорт мероприятийĕсене, пултарулăх конкурсĕсене, класс тулашĕнчи ĕçсене район хаçатĕнче, район администрацийĕн, вĕренÿпе çамрăксен политикин пайĕн, шкулсен сайчĕсенче анлăн çутатнă.
Уйăхлăх вĕренекенсен патриотла туйăмне, гражданла позицине çирĕплетме, класс коллективĕсене пĕтĕçтерме, ачасен ертсе пырас пахалăхне палăртма май пачĕ.
А.ВОЛКОВА,
район администрацийĕн вĕренÿпе çамрăксен политикин пайĕн методисчĕ.